बुटवल : निर्माणधीन अवस्थामा रहेको सिद्धबाबा सुरुङमार्गमा आइतबारदेखि विस्फोट गराएर काम थालिने भएको छ । तिनाउ गाउँपालिका–३ पाल्पास्थित सिदार्थ राजमार्गको सिद्धबाबा क्षेत्रमा सुरुङमार्ग निर्माणको काम हालसम्म ११ दशमलव ४१ प्रतिशत भौतिक र साढे १७ प्रतिशत वित्तिय प्रगति भएको छ ।
प्रमुख जिल्ला अधिकारीको अध्यक्षतामा बसेको जिल्ला सुरक्षा समिति रुपन्देही र पाल्पाको बैठकले नेपाली सेना र नेपाल प्रहरीको उपस्थितिमा आवश्यकता अनुसार नियमित रुपमा विस्फोट गराएर सुरुङमार्ग निर्माणको कामलाई तिव्रता दिने निर्णय भएको छ । विस्फोटनका समयमा सिमित अवधिका लागि सवारी साधनको आवागमन समेत बन्द गरिने सुरक्षा समितिको बैठकले निर्णय गरेको सिद्धबाबा सुरुङमार्ग योजना कार्यालय बुटवलका इन्जिनियर सविता ज्ञवालीले जानकारी दिइन् ।
एक हजार १ सय २६ मिटर लम्बाइको उक्त सुरुङमार्ग निर्माणको ठेक्का ‘चाइना स्टेट कन्स्ट्रक्सन इन्जिनियरिङ कर्पोरेसन लिमिटेड’ ले लिएको छ । योजनाको कुल लागत ७ अर्ब ३४ करोड रुपैयाँ छ । पाँच वर्षभित्र निर्माणको सवै काम पुरा गर्नेगरी २०७८ साल फागुनमा परियोजनाको सम्झौता गरिएको हो । सुरुङ मार्ग निर्माणका लागि स्विस सरकारले सहयोग गरेको छ ।
सुरुङमार्गका साइट इन्जिनियर श्रृजेश पौडेलका अनुसार सुरुमार्ग क्षेत्र बाहेक माथिल्लो र तल्लो सिद्धबाबा क्षेत्रको बुटवलतर्फ ९ सय ४ र पाल्पातर्फ १ हजार ४ सय ९४ मिटर सडकको समेत स्तरोन्नती गर्ने योजना छ । निर्माण स्थलमा हाल १ सय ५० जना मजदुरहरुले २४ सैँ घण्टा काम गरिरहेका छन् ।
प्रतिक्रिया दिनुहोस !
