गोरखा : गोरखा छेकम्पारका दुई युवालाई तिब्बत प्रहरीले पक्राउ गरेको छ। चुमनुब्री गाउँपालिका-७ (साविक छेकम्पार गाविस) स्थित लामागाउँका कर्मा राप्के लामा र छुले गाउँका कर्मा छेदेन लामालाई प्रहरीले पक्राउ गरेको हो।
करिब डेढ महिनाअघि दुवै जनालाई तिब्बती प्रहरीले तिब्बती भूमिबाटै पक्राउ गरेको स्थानीयबासीले बताएका छन्। तिब्बती पक्षबाट टेलिफोन सम्पर्क गरी बोलाएर पक्राउ गरेको बताइएको छ।
उनीहरु पक्राउ परेको बारे ढिला गरी जानकारी आएको सो गाउँपालिकाका अध्यक्ष निमा लामाले जनाएका छन्। ‘उनीहरु तिब्बतमा पक्राउ परेका छन् भन्ने अनौपचारिक रुपमा जानकारीमा आएको छ, तर आधिकारिक रुपमा आएको छैन’, गाउँपालिकाका अध्यक्ष लामाले भने, ‘पक्राउ परेकाहरुको परिबारले पनि आधिकारिक रुपमा जानकारी गराएका छैनन्।’
जिल्ला प्रहरी कार्यालय गोरखाले पनि सो घटना बारे अनौपचारिक रुपमा मात्र थाहा पाएको जनाएको छ। सो गाउँका सबैजना यार्सागुम्बा संकलन गर्न लेकमा गएको हुँदा सत्यतथ्य सोधपुछ गर्न नसकिएको प्रहरीको भनाइ छ।
पक्राउ परेका दुई युवाका आफन्तजनसहित सबै गाउँले तिब्बती सीमा आसपासको लेकमा यार्सागुम्बा संकलन गर्न गएको हुँदा विस्तृत जानकारी प्राप्त हुन सकेको छैन। पक्राउ पर्नुका कारण तथा पक्राउ परेको मिति समेत खुलेको छैन।
बिगत पाँच बर्षदेखि चिनियाँ सरकारले गोरखा र तिब्बतको सीमानामा पर्ने मुलाढाज्यान नाका बन्द गरेको छ। नाका बन्द भए पनि यी दुई युवालाई सीमानामा बोलाएर पक्राउ गरेको हो। गम्भीर आरोपमा उनीहरु पक्राउ परेको हुनसक्ने स्थानीयबासीको अनुमान छ। जिल्ला सदरमुकामबाट ५० कोशभन्दा टाढा रहेको छेकम्पार तिब्बती सीमा क्षेत्रमा पर्ने गोरखाको अन्तिम गाउँ हो।
प्रतिक्रिया दिनुहोस !
