चितवन : पर्यटकीय केन्द्र बनेको पटिहानीमा पर्यटकीय गतिविधि बढाउन नौलो परिकल्पना गरिँदै आएको छ । केही वर्ष पहिला निर्माण गरिएको अम्रेला स्ट्रिटले पर्यटकीय चहलपहल बढायो । आन्तरिक पर्यटन बनाउन नयाँ खालका अवधारणा ल्याइएको छ ।
पर्यटकको रोजाइलाई मध्यनजर गर्दै पटिहानीमा फेर िअर्को गन्तव्य निर्माण गरिएको छ ‘स्टोन पार्क’ । पर्यटकको आकर्षणका लागि ढुंगाका संरचना तयार गरेर पार्क बनाइएको छ । भरतपुर–२२ स्थित राप्ती नदी किनारमा रहेको पार्कबाट मनोरम दृश्य अवलोकन गर्न सकिन्छ ।
ढुंगा छापेर वाकिङ ट्रेल, सेल्फी पोइन्ट, भ्यु टावर, ढुंगाकै विश्रामस्थल बनाइएको छ । राप्ती नदीमा डुंगा चढ्न आउने घाट छ । पारिपट्टी निकुञ्ज छ । निकुञ्जका जनावर देख्न सकिन्छ । यसैमा पर्यटक रमाउँछन् । राप्ती नदी र केरुङ घोलले कटान गरेर उकासिएको जग्गामा १ करोड २० लाखको खर्चमा आकर्षक पार्क बनाइएको भरतपुर–२२का वडाध्यक्ष विष्णुराज महतोले बताए । दक्षिण कोरियामा स्टोन पार्क देखेपछि वडाध्यक्ष महतोले त्यही अवधारणा लागू गरेका हुन् । ‘यहाँ बाढी पनि लाग्छ । बाढीले ढुङ्गालाई क्षति नगर्ने भएपछि ढुंगैढुंगाले बनेको पार्क बनाएका हौं,’ उनले भने, ‘यो ढुंगाले सिँगारिएको पार्क हो,’ महतोले भने, ‘राप्ती नदीसँगै निकुञ्जको दृश्य हेर्न सकिन्छ । यसको महत्व दिनहुँँ बढ्छ भन्ने लागेको छ ।’
पार्क नजिकको क्षेत्रमा बोटे समुदायको बस्ती छ । उनीहरूको जीविकोपार्जनसँग पार्कलाई जोडिएको छ । पार्कको उद्घाटनका अवसरमा रैथाने खाना महोत्सव पनि गरिएको थियो । भरतपुर महानगरपालिकाले भ्रमण वर्ष–२०२४ मनाइरहेको छ ।
पटिहानीमा निर्माण गरिएको स्टोन पार्क नयाँ गन्तव्यका रूपमा पर्यटक आगमन गर्ने महानगरपालिका प्रमुख रेनु दाहालले बताइन् । ‘नदीले उकासिएकै प्रयोगविहीन भएको जग्गामा वडादेखि संघीय र प्रदेश सरकारको लगानी पनि मनमोहक पार्क बनेको छ ।,’ दाहालले भनिन्, ‘नयाँ सोचाइको पार्क बनेको छ । नदी तटीय क्षेत्रमा घुम्न आउँदा रमाइलो हुने प्राकृतिक सौन्दर्यताको अनुभूति हुने पर्यापर्टनको भरतपुरमा कोसेढुंगा बन्ने विश्वास छ ।’ भरतपुरलाई पर्यापर्यटनको केन्द्र बनाउन यो पार्कले भूमिका खेल्ने दाहालको भनाइ छ ।
प्रतिक्रिया दिनुहोस !
