वीरगन्ज : विगतका वर्षभन्दा यस वर्ष देशभरि अत्यधिक गर्मी छ । वीरगन्ज,कलैया र यस आसपासका क्षेत्रको तापक्रम दिनप्रतिदिन बढ्दै गइरहेको छ । यस आसपास क्षेत्रमा अधिकतम तापक्रम ४० डिग्री सेल्सियस वा सो भन्दा बढि मापन भइरहेको छ ।
प्रचण्ड गर्मी अनि तातो हावा चल्दै आएका कारण वीरगन्ज र यस आसपास क्षेको जनजीवन अस्तव्यस्त बनेको छ । गर्मीले आकुलव्याकुल हुँदा वीरगन्ज, कलैयालगायतका सहरी क्षेत्रका मानिस गर्मी छल्न मकवानपुरको त्रिखण्डी पुग्ने गरेका छन् ।
तर, वीरगन्ज,कलैया र यस आसपासका मानिसका लागि गर्मी छल्न र घुमफिर गर्न अब पर्साको ठोरी पनि नयाँ गन्तव्य बन्दै गइरहेको छ । हुलाकी सडक बनेपछि वीरगन्ज,कलैयालगायतका क्षेत्रका स्थानीय घुमफिर गरी रमाइलो गर्न र गर्मीका बेला शीतलताको आनन्द लिन अचेल ठोरी जान थालेका छन् ।
मधेस प्रदेशकै मुख्य पर्यटकीय स्थलका रुपमा स्थापित हुँदै आएको ठोरीमा प्राकृतिक रुपमा निक्कै मनोरम छ । कलकल पानी बग्ने आधा दर्जन भन्दा बढी खोला, हरियाली जंगल र पहाडले सिंगारिएको ठोरीमा पुग्ने जोकोही पनि आनन्दित हुन्छन् ।
यसअघि वनभोज खान र घुम्न पुग्ने भारतीयले दिनहुँ भरिभराउ हुने गरेको ठोरीस्थित अमृतधारा पार्कमा अचेल वीरगन्ज,कलैया ,परवानीपुर, जितपुरलगायतका स्थानबाट पनि पुगेकाहरूको चहलपहल देख्न पाइन्छ । ठोरी घुम्न पुग्नेहरु सेतो पहाडसँगै टाँसिएरै रहेको ठुटे खोलाको चिसो पानीमा नुहाएर रमाउँदै आएकोमा अब ठोरीमै चिसो अनि कलकल पानीमा नुहाउनका लागि अर्को मनोरम तालु खोलापनि आर्कषणको केन्द्र बन्न थालेको छ ।
ठोरीस्थित मध्यवर्ती वनभित्र रहेको रानी वन वनभोज पार्क छेउमै रहेको तालु खोलामा अचेल गर्मी छल्न नुहाउन पुग्नेहरुको संख्या बढ्दै गएको छ । मानवबस्तीबाट करिब ५ सय मिटरभित्रको जंगलबिचमा बगिरहेको तालु खोलामा अहिलेको गर्मीका बेला पुगेर नुहाउँदा मनै शीतलो हुन्छ ।
ठोरी बजाार क्षेत्रका होटल व्यवसायी रामशरण लमिछाने भन्छन्,‘पहिले पहिले ठोरीममा घुम्न आउनेहरु ठुटे खोलामा नुहाएर रममाइलो गर्थे । तर, अहिले नुहाएर रमाइलो गर्ने अर्को गन्तव्य तालु खोला पनि बन्दै गएको छ ।’ठोरीमा घुम्न जानेहरूका लागि रमाउने अन्य प्राकृतिक गन्तव्यहरुपनि थुप्रै छन् ।ती हुन् –रेडहिल पार्क , गोले डाँडा, झोलुङ्गे पुल,रानीवन पार्क,अमृतधारा पार्क ,गणेशमान सिंह पार्क इत्यादि ।
हुलाकी सडक बनेर ठोरी घुम्न आउने भारतीयसँगै आन्तरिक पर्यटकहरूको संख्या बढ्दै गएपछि ठोरीमा खानपान र बास बस्नका लागि होमस्टेसँगै सुविधासम्पन्न होटल र रेष्टुरेण्टहरु पनि खुल्न थालेका छन् । तीनै मध्येको एक हो– ठोरी जंगल रिसोर्ट ।
स्थानीय चारजना युवा उद्यमीले मिलेर सगोलमा सञ्चालनमा ल्याएको ठोरी जंगल रिसोर्ट पनि ठोरी घुम्न र रमाइलो गर्न पुग्नेहरूका लागि अर्को एक आकर्षणको केन्द्र बन्दै गएको छ ।
ठोरी–२ इच्छानगरमा करिब तीन बिघा क्षेत्रफलमा करिब ३ करोड रुपैयाँको लगानीमा सञ्चालित उक्त रिसोर्टमा अचेल आन्तरिक र बाह्य पर्यटकको चहल पहल राम्रै देखिन्छ। उक्त रिसोर्टमा एक रातमा ३० बढीलाई बास बस्न मिल्ने १० वटा सुविधासम्पन्न भिल्ला(कटेज) छन् भने एकैपटक १ सयभन्दा बढी पाहुनालाई खानपान गर्न सक्ने रेष्टुरेण्टपनि उपलब्ध छ ।
रिसोर्टका सञ्चालक सुदीप थापाका अनुसार नेपालको पर्सा,पर्सा, बारा, मकवानपुर,चितवन,काठमाडौंदेखि पाहुनाहरु आउने गरेका छन् । यसका साथै भारत बिहारको रक्सौल,नरकटीयागञ्ज,मोतीहारी,बेतिया,मुजफरपुर पटनासम्मबाट पनि भारतीयहरू घुम्न र रमाइलो गर्न आउने गरेको उनले बताए । रिर्सोटमा आउने पाहुनाले चाहना राखेमा जंगल सफारीको व्यवस्था पनि गरिएको रिसोर्टका अर्का सञ्चालक धिर सिंह थापाले बतााए ।
प्रतिक्रिया दिनुहोस !
