सरकारले २८ जिल्लामा सामाजिक सुरक्षा भत्ताका लागि राष्ट्रिय परिचयपत्र अनिवार्यको निर्णय गरेपछि देशैभरि हो भन्ने भान पर्न गयो । त्यसैको परिणाम सबैजसो जिल्लाका ज्येष्ठ नागरिक सकिनसकी राष्ट्रिय परिचयपत्र बनाउन सदरमुकामको प्रशासन कार्यालयमा धाएका छन् । परिचयपत्रका लागि मात्रै पनि बासै बसेर दुई÷तीन दिनको पालो पर्खिने ज्येष्ठ नागरिक गोरखा जिल्ला प्रशासनमा भेटिए । जब कि यो जिल्ला राष्ट्रिय परिचयपत्र अनिवार्य गरिएका २८ भित्र पर्दैन । देशैभरि यस्तै भानले ज्येष्ठ नागरिकले दुःख पाएका छन् । अनिवार्य गरिएकामा पनि उस्तै सास्ती छ । सिलिन्डरसहित नाकमा अक्सिजन लगाउँदै ज्येष्ठ नागरिकहरू प्रशासनको लाइनमा लाग्दा पनि सरकारले भने नजरअन्दाज गरेको छ । ताँतीका ताँती ज्येष्ठ नागरिक प्रशासनहरूमा धुइरिँदाको सास्तीप्रति सरकारको संवेदनशीलता देखिएको छैन ।
राष्ट्रिय परिचयत्र हरेक नागरिकलाई अनिवार्य गर्दै जाने नीति गलत होइन सही हो । तर ज्येष्ठ नागरिकलाई नै यसरी सास्ती दिने गरी सरकारले निर्णय गर्नु हुँदैनथ्यो । भन्न त शारीरिक रूपमा हिँडडुल गर्न नसक्नेका लागि होइन पनि भनिएको छ । तर नागरिकले सरकारको भर मानेका छैनन् भन्ने बुझ्नुपर्छ । भोलिका दिनमा त्यत्ति कारण भत्ता नपाइएला भन्ठानेरै ज्येष्ठ नागरिक प्रशासन धाएका हुन् । जनप्रतिनिधिहरू भने घरघरै पुगेर भत्ता वितरण गर्ने कुरा गर्छन् । अनि त्यही भत्ताका लागि प्रक्रिया पूरा गर्न चाहिँ सरकार किन ज्येष्ठ नागरिकका घरघरै पुग्न सक्दैन ?
परिचयपत्र नभई राहदानी नबन्ने वा अरु सरकारी कागजातका लागि अनिवार्य हुँदै गएको छ । क्रमशः सबै सेवाका लागि त्यो परिचयपत्र अनिवार्य बनाउने सिलसिला ठीक हो । तर अस्ताउँदै उमेरका नागरिकलाई सुख दिनु साटो दुःख दिनुचाहिँ गलत हो । युवा र नयाँ पुस्तालाई चाहिँ सबै सरकारी तथा निजी कामकै लागि पनि परिचयपत्र अनिवार्य गर्दै लगेर निश्चित समयभित्र सबै नेपालीको राष्ट्रिय परिचयपत्र हुने व्यवस्था गर्नुपर्छ ।
त्यसपछि भने कुनै पनि कामका लागि नागरिकता वा अरू परिचय खुल्ने कागजातको सट्टा परिचयपत्र नम्बरमात्रै दिँदा पुग्ने व्यवस्था हुनुपर्छ । जस्तो कि विकसित देशहरूमा सामाजिक सुरक्षा नम्बर लिएपछि पुग्छ । त्यही दिशामा नेपाललाई पनि लैजान सरकारले अहिलेलाई ज्येष्ठ नागरिकबाहेकलाई राष्ट्रिय परिचयपत्र अनिवार्य गर्नु उपयुक्त छ । अनि, फारम भरेर पनि वर्षाैंसम्म परिचयपत्र नपाइने अवस्था पनि अन्त्य गर्न अत्यावश्यक छ ।
प्रतिक्रिया दिनुहोस !
