जोमसोम : कोष तथा लेखा नियन्त्रक कार्यालय मुस्ताङले जिल्लाका ५ पालिकालाई ८१ करोड १४ लाख ५२ हजार वित्तीय हस्तान्तरण गरेको छ। कार्यालयको तथ्यांकअनुसार संघीय तथा प्रादेशिक सरकारको विभिन्न शीर्षकको अनुदान रकमबापत उक्त बजेट पालिकालाई हस्तान्तरण भएको हो।
आर्थिक वर्ष २०८०/०८१ मा संघीय सरकारले विनियोजन गरेको कुल अनुदान बजेटमा ७ प्रतिशत बजेट कटौती गरी ९३ प्रतिशतमात्र अनुदान बजेट निकासा गर्न कोलेनिका मुस्ताङलाई अख्तियारी दिएको थियो। यसैगरी प्रादेशिक सरकारले पनि २५ प्रतिशत बजेट कटौती गरी ७५ प्रतिशत बजेट अनुदान निकासा दिन कोलेनिका मुस्ताङलाई अख्तियारी दिएको कोष नियन्त्रक भण्डारीको भनाइ छ। जसका कारण सुरुवाती चरणमा विनियोजन भएको अनुदान बजेट स्थानीय तहहरूले पाउन नसकेको कोष नियन्त्रक भण्डारीले उल्लेख गरे।
संघीय सरकारले बजेट कटौती गरेसँगै मुस्ताङका पाँच स्थानीय तहको १७ करोड ७८ लाख अर्थात् (१९.०२) प्रतिशत बजेट फ्रिज भएको हो। यस्तै, प्रदेशतर्फको अनुदानमा २ करोड २७ लाख अर्थात् (२९.४३) प्रतिशत बजेट फ्रिज हुन पुगेको हो। यद्यपि बजेट कटौतीको प्रतिशतअनुसार छाडेर हेर्दा मुस्ताङका पाँच पालिकाले कुल संघीय अनुदानको (११.०२) प्रतिशत बजेट फ्रिज भएकोे हो। प्रदेशतर्फ २५ प्रतिशत कटौती गर्ने बजेट छोडेर हेर्दा (४.४७) प्रतिशत बजेट फ्रिज भएको हो।
कोलेनिका कार्यालय मुस्ताङका अनुसार घरपझोङ गाउँपालिकालाई संघीय कुल बजेट २० करोड ९६ लाखमध्ये १८ करोड ७२ लाख र प्रदेशतर्फको कुल बजेट १ करोड ७६ लाखमा ७५ लाख १४ हजार बजेट निकासा भएको छ। थासाङलाई संघीय कुल बजेट २२ करोड २२ लाखमा १८ करोड ७१ लाख र प्रदेशतर्फ कुल बजेट १ करोड ५८ लाखमा १ करोड १२ लाख निकास भएको छ।
वारागुङ मुक्तिक्षेत्रलाई संघीय बजेट १७ करोड ३६ लाखमा १३ करोड ४१ लाख र प्रदेशतर्फको कुल १ करोड ५२ लाखमा १ करोड १५ लाख बजेट कोलेनिका मुस्ताङले निकासा दिएको हो। यस्तै, संघीयतर्फ लोघेकर दामोदरकुण्डलाई १५ करोड ४८ लाख विनियोजन भएकोमा ११ करोड ३२ लाख बजेट र प्रदेशतर्फ १ करोड ३७ लाखमा १ करोड ६ लाख बजेट निकासा भएको हो। लोमान्थाङ गाउँपालिकालाई संघीय अनुदान १७ करोड ४५ लाखमा १३ करोड ५३ लाख र प्रदेशतर्फ १ करोड ४६ लाखमा १ करोड ३४ लाख बजेट निकासा दिएको हो।
प्रतिक्रिया दिनुहोस !
