सिन्धुपाल्चोक : सिन्धुपाल्चोक इन्द्रावती गाउँपालिका-३ को कार्यालयमा स्थानीयले ताला लगाएका छन्। वडा कार्यालयको भवन कहाँ बनाउने भन्ने विषयमा विवाद हुँदा वडाका राजनीतिक दलहरूको सहभागितामा स्थानीयले वडा कार्यालयमा ताला लगाएका हुन्।
वडा कार्यालय निर्माणको ठेक्का लागिसक्दा समेत जनप्रतिनिधिले उपयुक्त स्थानको छनोट गर्न नसकेको भन्दै स्थानीय विरोधमा उत्रिएका छन्। जनप्रतिनिधिहरूले वडा कार्यालय खुतुमेडाँडामा बनाउने निर्णय गरेपछि स्थानीय आक्रोशित भएका हुन्। ‘वडा कार्यालय सबैलाई सहज पहुँच हुने र सहजता हुने ठाउँमा हुनुपर्छ’, पूर्ववडाध्यक्ष देवप्रसाद बानियाँले भने, ‘वडा कार्यालय बन्नु राम्रो भए पनि स्थानीय नागरिकको अपेक्षाअनुसार नहुनु दुःखको कुरा हो।’
उनले वडा जनप्रतिनिधिहरूले रोजेको स्थान स्थानीयको लागि पायक नपर्ने बताए। वडा कार्यालय स्थानीयको रोजाइको ठाउँमा हुनुपर्ने उनको धारणा छ। वडा कार्यालय निर्माण गर्ने स्थलको टुंगो नलागेसम्म वडा कार्यालयमा लगाइएको ताला नखोलिने स्थानीय एवं राप्रपाका नेता भूपेन्द्र बानियाँले बताए। ‘स्थानीयलाई पायक पर्ने सतीको माने, लाकुरीको बोट, भन्ज्याङ र पातालमध्ये कुनै एउटा तोक्ने हो भने सर्वदलीय संयन्त्रले सहयोग गर्छ’, उनले भने, ‘तर अपायक हुने खुतुमेडाँडामा हामी वडा कार्यालय बनाउन दिँदैनौं।’ कसैको स्वार्थका कारण आम नागरिकलाई सास्ती भोग्ने वातावरण स्थानीय सरकारले बनाउन नहुने उनले बताए।
१ करोड २१ लाख रुपैयाँमा वडा कार्यालय बनाउन ठेक्का सम्झौता भए पनि वडा कार्यालय भवन कहाँ बनाउने भन्ने विवादले कार्यालय बन्ने अनिश्चितता थपिएको छ। वडाध्यक्ष भीमसेन थापाले भने यसअघि नै जग्गा खोजको लागि सर्वदलीय संयन्त्रलाई अधिकार दिए पनि सो संयन्त्रले जग्गा खोज्न नसकेपछि जनप्रतिनिधिले सहजीकरण गरेको बताए। ‘वडा कार्यालय बनाउन पर्याप्त जग्गासहितको उचित ठाउँ नभेटिएपछि खुतुमेडाँडालाई नै वडा कार्यालय कायम गर्ने निर्णय गरिएको हो’, उनले भने।
वडा कार्यालयका अनुसार गत वर्ष २०८० असोज ६ गते सर्वदलीय संयन्त्र र वडा कार्यालय बीच बैठक बसी ४५ दिनको समय दिएर सर्वदलीय संयन्त्रलाई जग्गा खोज्ने अधिकार दिएको थियो। तर सो समितिले तोकिएको अवधिमा जग्गा खोज्न नसकेपछि आफूहरूले नै जग्गा व्यवस्थापन गर्नु परेको वडाध्यक्ष थापाले बताउँछन्।
‘दिएको अधिकार प्रयोग गरी उपयुक्त स्थानमा वडा कार्यालय निर्माण गर्ने जग्गा उपलब्ध गराउन नसक्ने अनि आफैं वडा कार्यालयमा आएर ताला लगाउने, यो त न्यायसंगत भएन नि’, वडाध्यक्ष थापाले भने, ‘भवन निर्माणको लागि ठेक्का लागिसकेको छ, समयमै जग्गा उपलब्ध नगराए भवन बन्दैन। उहाँहरूले जग्गा उपलब्ध नगराएपछि हामीले खुतुमेडाँडामा भवन बनाउने निर्णय गरेका हौं।’ वडा कार्यालय निर्माण भए सेवा प्रवाह सहज हुने बताउँदै उनले यस कार्यमा स्थानीयलाई सहयोग गर्न आग्रह गरे।
प्रतिक्रिया दिनुहोस !
