विराटनगर : मोरङको जहदाबाट प्रहरीले बुधबार राति लागूऔषध गाँजासहित एक जनालाई पक्राउ गरेको छ। जहदा गाउँपालिका–१ धुनी टोलका २६ वर्षीय अमित मण्डल राति ९:३० बजेतिर पक्राउ परेका हुन्।
इलाका प्रहरी कार्यालय बुधनगरबाट खटिएको सइ उज्वल शाक्य नेतृत्वको टोलीले प्रदेश १–०४–००१ प ९८०२ नम्बरको मोटरसाइकल नियन्त्रणमा लिएर चेकजाँच गर्दा गाँजा बरामद भएको थियो।
गाँजा बरामद भएसँगै मोटरसाइकल चालक मण्डललाई पक्राउ गरिएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए। उनका अनुसार ६ किलोग्राम गाँजा बरामद भएको छ।
पक्राउ परेका मण्डल, बरामद भएको गाँजा र नियन्त्रणमा लिइएको मोटरसाइकललाई इलाका प्रहरी कार्यालय रानीमा राखिएको छ। यस विषयमा थप अनुसन्धान भइरहेको डीएसपी बस्नेतले बताए।
प्रतिक्रिया दिनुहोस !
