गुल्मीमा गुडिरहेको बसमा लेदो सहितको पहिरो
![गुल्मीमा गुडिरहेको बसमा लेदो सहितको पहिरो](https://annapurnapost.prixacdn.net/media/albums/Untitled-1_O4RYSmT7xl_TrpkP2ipb6.jpg)
गुल्मी : बुटवलदेखि गुल्मीको सदरमुकाम तम्घास आउँदै गरेको बसमा लेदो सहितको पहिरोले क्षति पुर्याएको छ। जिल्लाको रुरुक्षेत्र गाउँपालिका-१, रातामाटा स्थित सडकमा एक्कासि लेदो सहितको पहिरो खसेर लु १ ख ५९२० नम्बरको बसको केही भाग पुरिएको हो।
गुडिरहेको बसमा एक्कासि पहिरो खस्दा बसको केही भाग पुरिएको र यात्रु भने सकुशल रहेको जिल्ला प्रहरी कार्यालय गुल्मीले जनाएको छ। बसमा बुटवलदेखि तम्घासका छ जना र अन्य स्थानका तीन गरेर ९ जना यात्रु सवार थिए।
मदन भण्डारी राजमार्गअन्तर्गत उक्त सडकमा अहिले इलाका प्रहरी कार्यालय रिडी गुल्मीका प्रहरी निरीक्षक अनिल थापाको कमान्डमा प्रहरी , जनप्रतिनिधि, स्थानीयको सहयोगमा पहिरो फाल्ने र बस निकाल्ने काम भइरहेको छ। गुल्मी लगायत आसपासका क्षेत्रमा मंगलबार बिहानदेखि अविरल वर्षा भइरहेको छ। ग्रामीण क्षेत्रका सडक पहिरोका कारण अवरुद्ध बनेका छन्।
यात्रु बर्सात र पहिरोका कारण जोखिमपूर्ण यात्रा गर्न बाध्य छन्। मदन भण्डारी राजमार्गको रिडीदेखि भेडुवासम्मको २५ किलोमिटर सडकमा स्तरोन्नतिको काम भइरहेको छ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)