काठमाडौं : सत्तारुढ दल नेकपा एमालेको पोलिटब्युरो बैठक आज बस्दैछ। केन्द्रीय कार्यालय च्यासलमा गत बिहीबार बसेको पार्टीको सचिवालय बैठकले आज र भोलिका लागि पोलिटब्युरो बैठक बोलाउने निर्णय गरेको हो ।
प्रचार विभाग प्रमुख राजेन्द्र गौतमले बैठक दिउँसो १ बजे बस्न लागेको हो। उनका अनुसार सचिवालयले राखेको प्रस्ताव, पार्टीको वार्षिक कार्ययोजना र समसामयिक राजनीति, सरकारको कामको समीक्षा, तेस्रो चरणको पार्टीको सांगठनिक कार्यक्रम सार्वजनिक गर्ने विषयमा छलफल केन्द्रित हुनेछ। बैठकमा २०८४ सालसम्मको पार्टी कामको योजनाबारे विस्तृत छलफल र केन्द्रीय कमिटी बैठकमा लैजाने एजेण्डाका बारेमा पनि छलफल हुनेछ।
एमालेले सरकार र सांगठनिक गतिविधि सँगसँगै लगेर जनतामाझ पुग्ने लक्ष्य राखेको छ। पछिल्लो समय एमालेले पार्टीलाई चलायमान बनाइरहेको छ। मिसन ग्रासरुट, झुलाघाट चिवाभञ्ज्याङ संकल्प यात्रा चलाएको एमालेले हाल सरकारको नेतृत्व गरेपनि ‘मिसन ८४’ मा केन्द्रित देखिएको छ। मिसन ८४ लाई मध्यनजर गर्दै तीनै तहका जनप्रतिधिको कामलाई योजनाबद्ध रूपमा अघि बढाउनु अध्यक्ष केपी शर्मा ओलीले निर्देशन दिएका छन्।
एमालेले यसअघि २०८१ सालमा संगठन र सदस्यता विस्तार गर्ने, पार्टी शुद्धीकरण र सुदृढीकरण अभियान चलाउने गरी कार्ययोजना तयार पार्ने निर्णय गरेको थियो। एमालेको यस अगाडि बसेको सचिवालय बैठकले मिसन ८४ लाई केन्द्रित गरी ठूलो संख्यामा केन्द्रीय सदस्य र पदाधिकारीहरूको जिम्मेवारी हेरफेर, प्रतिनिधिसभा र प्रदेशसभा निर्वाचन क्षेत्रमा केन्द्रित गरेको छ।
पार्टीलाई बलियो र निर्णायक शक्तिका रूपमा स्थापित गर्ने संकल्प गरेको जनाउँदै पार्टीको समग्र कामलाई पनि सोही उद्देश्यअनुरूप अघि बढाउन नेता कार्यकर्तालाई एमाले नेतृत्वको निर्देशन छ।
प्रतिक्रिया दिनुहोस !
