फिदिम : पूर्वी पहाडको लाइफ लाइनको रुपमा रहेको मेची राजमार्ग अझै अवरुद्ध छ । पाँचथरको फिदिम नगरपालिका- २ रमितेमा खसेको पहिरो पन्छाउन सकस हुँदा पाँच दिन यता राजमार्ग अवरुद्ध छ। अविरल वर्षापछि असोज १२ गते रातिको पहिरोले राजमार्ग अवरुद्ध भएको हो ।
चाडबाडको मुखमा लामो समयसम्म राजमार्ग अवरुद्ध हुँदा पाँचथर र ताप्लेजुङको जनजीवन नराम्ररी प्रभावित भएको छ । पहिरोले सडक छिनाएको र माथिबाट लेदो खस्ने क्रम जारी भएकाले समस्या भएको सडक डिभिजन कार्यालय ईलामका प्रमुख पवन भट्टराईले जानकारी दिए ।
‘राजमार्गको पहिरो पन्छाएर यातायात सुचारु गराउन हामी निरन्तर लागिरहेका छौँ,’भट्टराईले भने, ‘रमितेको पहिरोमा ठूलो समस्या भएकाले समय लागेको हो ।’ यसअघि भित्तो कोट्याएर रोकीएका केही सवारी साधानहरु वारपार गराइएको थियो ।
सडक सुचारु गरेको केही घण्टामै फेरी पहिरो खसेपछि यातायात ठप्प भएको छ । भिरालो जमिन चिराचिरा परेकाले लेदोसहितको पहिरो खस्ने क्रम नरोकिएको हो । मौसमले साथ दिए शुक्रबार बेलुकासम्ममा अवरोध हटाउन सकिने भट्टराईको भनाइ छ ।
‘अहिले ग्राभेल हाल्ने काम गरिरहेका छौँ,’भट्टराईले भने, ‘भित्तो बगेर आउने र सडक भासिने समस्या देखिएको छ । त्यो समस्या समाधान गर्न केही समय लाग्छ ।’ अरुतिरको पहिरो पन्छाइसकेको र रमितेको समस्या समाधान हुने वित्तिकै यातायात सञ्चालन गर्न सकिने भएको छ ।
लामो समयसम्म राजमार्ग अवरुद्ध हुँदा पाँचथरको फिदिम नगरपालिका सहित, फालेलुङ, हिलिहाङ, याङवरक गाँउपालिका र सिङ्गो ताप्लेजुङको जनजीवन प्रभावित भएको छ ।
प्रतिक्रिया दिनुहोस !
