फिदिम: मेची राजमार्गस्थित पाँचथरको फिदिम नगरपालिका -४ र हिलिहाङ गाउँपालिका- ७ को सिमानामा बग्ने हेवा खोलामा फड्के निर्माण गरिएको छ । बाढीले बेलीबृज बगाएको पाँच दिनमा बल्ल फड्के निर्माण सम्पन्न गरिएको हो ।
फड्के निर्माण भएपछि शुक्रबार बिहानैदेखि पैदल यात्री र मोटरसाइकलहरू आवतजावत गर्न थालेका छन् । नेपाली सेनाको रणशेर दल गणसहित सशस्त्र प्रहरी,जनपथ प्रहरी,नगर प्रहरी र स्थानीय युवाहरूले फड्के निर्माण गरेका हुन् ।
बेलीबृज बगाएपछि मेची राजमार्ग अवरुद्ध भएको थियो । मेची राजमार्ग हुँदै पाँचथरको हिलिहाङ गाउँपालिका,याङवरक गाउँपालिका र ताप्लेजुङसम्मको यातायात प्रभावित भएको थियो । फड्के निर्माण भएपछि मोटरसाइकल चालक र पैदल यात्रीलाई केही सहज भएको छ ।
झोलुङ्गे पुलमा प्रयोग गरिने लठ्ठाको प्रयोग गरे फड्के निर्माण गरिएकाले मोटरसाइकल सहज रुपमा तार्न मिल्ने नेपाली सेनाको रणशेर दल गणका गणपति निरज प्रताप जवराले बताए । ‘फड्केबाट मोटरसाइकल तार्न कुनै समस्या हुँदैन,’जबराले भने, ‘ढुक्कले वारपार गर्न मिल्ने गरि फड्के बनाइएको छ ।’
मेची राजमार्गहुँदै यो सिजनमा ताप्लेजुङमा अवस्थित पाथीभरा देवीको दर्शका लागि दैनिक सयौं मानिसले यात्रा गर्छन् । पुल बगेर यातायात प्रभावित भएपछि यस क्षेत्रको धार्मिक पर्यटनमा समेत नराम्ररी असर पुगेको छ । गत वर्षको असार २ गतेको बाढीले हेवा खोलाको पक्की पुल बगाएपछि बेलीबृज बनाइएको थियो ।
एक वर्षको अवधिमा बेली बृज पनि बाढीले बगाएपछि यातायात अवरुद्ध भएको हो ।
प्रतिक्रिया दिनुहोस !
