दैलेख उपनिर्वाचन : महाबुमा ५२ र दुल्लु–१३ मा ५४ प्रतिशत मत खस्यो

दैलेख :स्थानीय तह उपनिर्वाचन अन्तर्गत दैलेखको महाबु गाउँपालिकाको अध्यक्ष र दुल्लु नगरपालिका–१३ को वडाध्यक्षका लागि मतदान भइरहेको छ। 

दुबै पदका लागि बिहान ७ बजेबाटै सुरु भएको मतदान जारी छ। जिल्ला निर्वाचन कार्यालय दैलेखको निर्वाचन अधिकारी नरबहादुर सलामीका अनुसार महाबु गाउँपालिकाको अध्यक्ष पदका लागि दिउँसो ३ बजेसम्म ६ हजार ८ सय ३७ मत खसेको छ। यो कुल मतदाताको ५४.२ प्रतिशत मत हो। 

महाबु गाउँपालिकामा १६ वटा मतदान केन्द्रमार्फत मतदान भइरहेको छ। यहाँ कुल १२ हजार ६ सय १४ जना मतदाता रहेका छन्। महाबुको अध्यक्षमा कांग्रेसबाट झलकबहादुर भण्डारी, एमालेबाट जंगबहादुर शाही, माओवादीबाट जंगबहादुर बराल मगर र राष्ट्रिय स्वतन्त्र पार्टी (रास्वपा)बाट प्रकाशकुमार बुढा चुनावी मैदानमा होमिएका छन्। यस्तै राप्रपाबाट सुर्जे रावत र नेमकिपाबाट दुर्गबहादुर मगर पनि चुनावमा होमिएका छन्।

यस्तै दुल्लु नगरपालिका–१३ को वडाध्यक्षका लागि दिउँसो ३ बजेसम्म एक हजार चार सय ७० मत खसेको छ। यो कुल मतदाताको ५४.३२ प्रतिशत मत रहेको जिल्ला निर्वाचन अधिकारी सलामीले बताए। दुल्लु नगरपालिका–१३ मा ४ वटा मतदान केन्द्र मार्फत मतदान भइरहेको छ। यहाँ २ हजार ७ सय ६ मतदाता रहेका छन्। मतदान साँझ ५ बजेसम्म जारी रहने छ।