ककनी-२ उपनिर्वाचन : माओवादीले विरासत फर्कायो, दोब्बर मतले घिमिरे विजयी

नुवाकोट : नुवाकोटको ककनी गाउँ पालिका २ को अन्तिम मत परिणाम सार्वजनिक भएको छ । ककनी–२ मा उपनिर्वाचन अन्तर्गत भएको मतदानको मतगणना अनुसार नेकपा माओवादी केन्द्र विजयी भएको छ । 

गत २०७९ को स्थानीय तह निर्वाचनमा काँग्रेसका उम्मेदवार तीलकबहादुर लामासँग थोरै मतले पराजित भएका माओवादी केन्द्रका ३८ वर्षीय  कृष्ण  घिमिरे मिलन विजयी भएका छन् । गत २०७९ को निर्वाचनमा वडाध्यक्षमा विजयी भएका तीलक लामाको गत वर्ष निधन भएपछि सो वडामा उपनिर्वाचन भएको हो । 

मत परिणाम अनुसार नुवाकोटको ककनी–२ मा नेकपा माओवादी केन्द्रका उम्मेदवार घिमिरे झण्डै दोब्बर मतले विजयी भएका हुन् । सो वडामा दुईहजार दुई सय ५५ अर्थात् ७१ दशमलव ०६ प्रतिशत मत खसेको थियो । ५१ मत वदर भएको छ । ने 

गत २०७९ को निर्वाचनमा भने घिमिरेले कांग्रेसकै तीलक लामासँग १ सय ५४ मतले हार ब्यहोरेका थिए । त्यतिबेलाको पराजयलाई यो उपनिर्वाचनमा झण्डै दोब्बर मतले बदला लिँदै घिमिरे विजयी भएका हुन् ।

२ हजार २ सय ५५ मतगणनामा घिमिरे १ हजार ८५ मत प्राप्त गरेर विजयी भएका हुन् । उनका निकटतम् प्रतिद्वन्द्वी कांग्रेसका सुर्य तामाङले ५ सय ८७ मत मात्रै पाएका छन् । ३१ महिना अगाडि विजयी कांग्रेसका तीलक लामाले ८ सय ८८ मत प्राप्त गरेका थिए भने घिमिरेले भने ७ सय ४३ मतमै चित्त बुझाएका थिए ।  

नेकपा (एमाले) का उम्मेद्वार यमबहादुर लामाले ३ सय ६६ मत प्राप्त गर्दै तेस्रो भएका छन् । रास्वपाका मंगलसिद्धी तामाङले ८३, राप्रपाका खेमबहादुर थापाले २८ र समाजवादीका मानबहादुर लामाले २३ मत प्राप्त गरेको मुख्य निर्वाचन अधिकृतको कार्यालय ककनीले जनाएको छ । 

ककनी २ मा वडाध्यक्ष पदका लागि ११ जना उम्मेदवार चुनावी प्रतिष्पर्धामा थिए ।  ककनी २ को वडाध्यक्षका लागि दुई स्थानमा चार मतदान केन्द्र कायम गरिएका थिए ।
 
कुल तीनहजार एकसय ७३ जना मतदाता रहेको सो वडामा दुई हजार दुइसय ५५ जनाले मत खसालेको जिल्ला निर्वाचन कार्यालय नुवाकोटले जनाएको छ ।  ककनी २ स्थित वडा कार्यालयको 'क' मतदान केन्द्रमा तीनसय ५५, 'ख' मा तीनसय ७९ तथा शिवालय मावि 'क' मतदान केन्द्रमा सातसय ७० र 'ख' मा सातसय ५१ गरि दुईहजार दुई सय ५५ अर्थात् ७१ दशमलव ०६ प्रतिशत मत खसेको जिल्ला निर्वाचन अधिकारी होमबहादुर थापामगरले जानकारी दिए । 

ककनी २ मा गत २०७४ सालको स्थानीय तह निर्वाचनमा माओवादीका केदार पौडेल वडाध्यक्षमा विजयी भएका थिए । सो वडामा यस पटक उपनिर्वाचनवाट माओवादीले जित फर्काएको हो ।