उदयपुर : उदयपुरका बेलका नगरपालिका वडा नं ९ को वडाध्यक्ष पदमा भएको निर्वाचनमा सोमबार राती १ बजेबाट मतगणना रोकिएको छ । अत्याधिक मात्रामा वदर मत देखिएपछि दलहरूबीच विवाद हुँदा मतगणना रोकिएको हो ।
निर्वाचन अधिकृत मनोजप्रसाद गुप्ताका अनुसार ५०० मतगणना सकिएपछि सदर र बदर मतको विषयमा दलहरूले असन्तुष्टि पोखेर रोकेका हुन् । ५०० मत गणना हुँदा २२० मत बदर भएको छ ।
प्राप्त मतपरिणाम अनुसार नेकपा एमालेको ८५, नेकपा माओबादी केन्द्रको ८० र नेपाली काँग्रेसको ६२ मत रहेको छ । सर्वदलीय बैठकमा चिन्हभन्दा अन्य ठाउँमा संकेत देखिए बदर गर्ने सहमति भएको थियो । सोही मुताबिक गणना प्रकृया अघि बढेको गुप्ताले बताए ।
यता नेकपा माओबादी केन्द्रले भने पुनः मतगणना गर्नु पर्ने माग रोखेको छ । विवाद बढेपछि सहमतिको प्रयास भइरहेको उनले बताए । यद्यपि बदर मतको विषयमा निर्वाचन अधिकृतले केही निर्णय लिन सकेका छैनन् भने सर्वदलीय बैठकसमेत बस्न सकेको छैन् ।
तीन हजार १६७ मतदाता रहेको बेलकामा एक हजार ८८५ मत खसेको थियो । बेलका नगरपालिका वडान. ९ मा ७ जना प्रतिसपर्धामा छन् । बेलकामा नेकपा एमालेका मोहन खड्का, नेपाली काँग्रेसका नवराज बस्नेत, नेकपा माओबादी केन्द्रका भरत घिमिरेले प्रतिसपर्धामा छन् ।
त्यसैगरी राष्ट्रिय स्वतन्त्र पार्टीका तेजमान विक, राप्रपाका टिकाप्रसाद फुँयाल, जनता समाजबादी पार्टीका राजकुमार राई र मंगोल नेशनल अर्गनाईजेसन पार्टीका सुरे तामाङ्गको उमेदवारी रहेको छ ।
गत ०७९ वैशाख २० गते सम्पन्न स्थानीयतह निर्वाचनमा यो वडामा काँग्रेसका पदम खड्का वडाध्यक्षमा निर्वाचित भएका थिए । उनको मोटरसाईकल दुर्घटनामा परेर निधन भएपछि उपनिर्वाचन भएको हो ।
प्रतिक्रिया दिनुहोस !
