उपनिर्वाचनमा कीर्तिपुर नगरपालिका र काठमाडौं-१६ को नतिजा अनपेक्षित आएको एमालेको निष्कर्ष

काठमाडौं :  नेकपा एमालेले मंसिर १६ मा भएको स्थानीय तहको उपनिर्वाचनमा कीर्तिपुर नगरपालिका र काठमाडौं-१६ को नतिजा अनपेक्षित आएको निष्कर्ष निकालेको छ। नेकपा एमालेको आज बसेको केन्द्रीय सचिवालय बैठकले कीर्तिपुर नगरपालिका, यसका केही वडा र काठमाडौं १६ को नतिजा अनपेक्षित आएको निष्कर्ष निकालेको हो। 

यस नतिजालाई एमालेले गम्भीरतापूर्वक लिएको उपमहासचिव प्रदीप ज्ञवालीले बताए। यसअघि एमालेले जितेका ७ वटा वडामा पद रिक्त भएकोमा  यस पटक एक गाउँपालिका अध्यक्ष र २ उपाध्यक्ष समेत थपिएकोले उपनिर्वाचन उपलब्धीपूर्ण भएको उनले बताए।  तर, दलप्रतिको जनमत फरक देखिएको उनको भनाइ छ। 

दुई वर्षको बीचमा राजनीतिक दलप्रतिको जनमत फरक देखिएको र सहरी क्षेत्रमा सोचेको जस्तो परिणाम नआएको बैठकले निष्कर्ष निकालेको छ।बैठकले शहरी क्षेत्रको जनमतसँग पार्टीलाई अझ बढी जोड्दै लैजानुपर्ने निष्कर्ष निकालेको उनले बताए ।  ‘सहरी क्षेत्रमा सोचेको जस्तो परिणाम आएन। गाउँमा पनि जनमत परिवर्तन भएको छ। यसका लागि जनप्रतिनिधिले काम गर्नुपर्ने देखियो,’ उनले भने।