अन्तिम श्रद्धाञ्जलीका लागि पीएल सिंहको पार्थिव शरीर सानेपा लगियो
पुष १, २०८१ सोमबार ११:५९:५१
काठमाडौं : काठमाडौं महानगरपालिकाका पूर्व मेयर पीएल सिंहको पार्थिव शरीरलाई अन्तिम श्रद्धाञ्जलीका लागि उनको निवास चाक्सीबारीबाट कांग्रेस केन्द्रीय कार्यालय सानेपामा लगिएको छ।
नेपाली कांग्रेसका नेता सिंहको पार्थिव शरीरलाई श्रद्धाञ्जलीका लागि बिहान उनको निवासमा राखिएको थियो। विभिन्न दलका नेता, काठमाडौं महानगरका प्रमुख, उपप्रमुख, शुभेच्छुक लगाएत चक्सिबारीमा पुगेर सिंहप्रति श्रद्धाञ्जली अर्पण गरेका थिए ।
सिंह २०४९ को स्थानीय तहको निर्वाचनमा काठमाडौंका मेयर निर्वाचित भएका थिए। उनको आज ८७ वर्षको उमेरमा उपचारका क्रममा निधन भएको पारिवारिक स्रोतले जनाएको छ । उनको निधनमा काठमाडौं महानगरले आज शोकबिदा दिएको छ।
सिंह पेटसम्बन्धी रोगबाट ग्रसित थिए। उनको आजै अन्त्येष्टि गरिने जनाएको छ।
प्रतिक्रिया दिनुहोस !
