काठमाडौं : रुसी विदेशमन्त्री सर्गेई लाभरोभले रुस करिब तीन वर्षको द्वन्द्व अन्त्य गर्न कुनै सम्झौताको हिस्साका रूपमा युक्रेनमा पश्चिमी शान्ति सैनिकहरूको तैनाथीको विरुद्धमा रहेको बताएका छन् ।
कुनै पनि शान्ति सम्झौता लागु गर्न युक्रेनमा विदेशी सेना राख्ने सम्भावनाको चर्चा पश्चिमी राजधानीहरूमा चलिरहेको छ । फ्रान्सेली राष्ट्रपति इमानुएल म्याक्रोन र पोल्यान्डका प्रधानमन्त्री डोनाल्ड टस्कले यस महिना वार्सामा भएको बैठकमा यस विषयमा छलफल गरेका थिए ।
रूसी विदेश मन्त्रालयले सोमबार प्रकाशित गरेको अन्तर्वार्तामा लाभरोभले राज्य सञ्चालित तास समाचार एजेन्सीलाई मस्कोले त्यो विचार र अमेरिकी राष्ट्रपति–निर्वाचित डोनाल्ड ट्रम्पले प्रस्ताव गरेका अन्य कुराहरूको विरोध गरेको बताए ।
“निस्सन्देह युक्रेनको नाटो सदस्यता २० वर्षका लागि स्थगित गर्ने र युक्रेनमा ‘बेलायती र युरोपेली सेना’ को शान्ति सेना पठाउने राष्ट्रपति–निर्वाचितका प्रतिनिधिहरूले उठाएका प्रस्तावहरूबाट हामी सन्तुष्ट छैनौँ,” उनले भने । क्रेमलिनले यसअघि ‘शान्ति सैनिकहरूको बारेमा कुरा गर्न निकै ढिलो भएको’ बताएको थियो ।
तीन हप्तामा सत्तामा आउने ट्रम्पले २४ घन्टामा शान्ति सम्झौता गर्न सक्ने दाबी गर्दै किएभलाई दिइने वासिङ्टनको अर्बौं डलरको आर्थिक र सैन्य सहयोगलाई प्रभावका रूपमा प्रयोग गर्ने बताएका छन् ।
यद्यपि, उनले अझै ठोस योजना प्रस्ताव गरेका छैनन् । उनको टोलीका सदस्यहरूले एक हजार किलोमिटर लामो अग्रिम मोर्चामा कुनै पनि युद्धविरामको निगरानी गर्न युरोपेली सेनाको तैनाथी र नाटोमा सामेल हुने किएभको महत्त्वाकांक्षामा लामो ढिलाइसहित विभिन्न विचारहरू राखेका छन् ।
रुसी र युक्रेनी दुवै राष्ट्रपतिले एकअर्कासँग प्रत्यक्ष वार्तालाई अस्वीकार गरेका छन् । साथै किएभ र मस्कोको स्थिति शान्ति सम्झौताका लागि स्वीकार्य सर्तहरू के हुन् भन्ने कुरामा धेरै फरक देखिन्छ ।
रुसी राष्ट्रपति भ्लादिमिर पुटिनले यसअघि युक्रेनलाई चार पूर्वी र दक्षिणी क्षेत्रहरू– डोनेट्स्क, खेरसन, लुगान्स्क र जापोरिझियाबाट आफ्नो सेना फिर्ता लिन माग गरेका थिए । यी क्षेत्रलाई रुसले कब्जा गरेको दाबी गरेको छ । किएभले भने शान्तिको बदलामा मस्कोलाई ती क्षेत्र दिने कुरा बारम्बार अस्वीकार गरेको छ ।
प्रतिक्रिया दिनुहोस !
