कोशीको छैटौं अधिवेशन अन्त्यका लागि प्रदेश प्रमुखलाई सिफारिस गर्ने निर्णय
चैत ७, २०८१ बिहीबार ११:२१:३८
विराटनगर : कोशी प्रदेशसभाको चालु छैटौं अधिवेशन बिहीबार रातिबाट अन्त्य गरिने भएको छ । प्रदेश सरकारको बिहीबार बिहान बसेको मन्त्रिपरिषद् बैठकले चालु आधिवेश अन्त्य गर्न प्रदेश प्रमुख पर्शुराम खापुङलाई सफारिस गर्ने निर्णय लिएको हो ।
सरकारको सिफारिसका आधारमा प्रदेश प्रमुखले चालु अधिवेशन अन्त्य गर्नेछन् । अधिवेशन राति १२ बजेबाट अन्त्य हुने प्रदेश सरकारका प्रवक्ता एवं आन्तरिक मामिला तथा कानुनमन्त्री रेवतीरमण भण्डारीले बताए । उनका अनुसार मन्त्रिपरिषद् बैठकले बैठक अन्त्य गर्ने निर्णय गरेको हो ।
बैठकले कोशी प्रदेश जनस्वास्थ्य नियमावली,२०८१ स्वीकृत गर्ने,समस्याग्रस्त सहकारी संस्था वा संघ व्यवस्थापन समितिको सदस्य सचिवमा चन्द्रबहादुर कार्कीलाई तोक्ने,समस्याग्रस्त सहकारी व्यवस्थापन समितिको कार्यालयका लागि १ करोड २८ लाख ६० हजार रूपैयाँ बाँडफाँट गर्न स्वीकृत प्रदान गर्ने, प्रदेश सरकारबाट स्थानीय तहलाई प्रदान गर्ने वित्तीय समानीकरण अनुदानको लागि अनुमानित सीमा १ अर्ब ५० करोड तथा राजस्व बाँडफाँटको अनुमान सीमा १ अर्ब १० करोड स्वीकृत गर्ने निर्णयसमेत गरेको छ ।
मन्त्री भण्डारीका अनुसार बैठकले उच्च तथा जिल्ला अदालत सुदृढीकरणका लागि १ करोड ५० लाख बाँडफाँट गर्न स्वीकृत प्रदान गरेको छ । राजनीतिक तथा प्रशासन समितिबाट परिमार्जित आर्थिक मामिला तथा योजना मन्त्रालय र मातहतका कार्यालयको संगठन संरचना तथा दरबन्दी तेरिज ,२०८१ पनि बैठकले स्वीकृत गरेको जानकारी भण्डारीले दिए ।
प्रतिक्रिया दिनुहोस !
