परासी : बढ्दै गएको वायु प्रदूषणको असर नवलपरासीमा पनि परेको छ। प्रदूषणका कारण आँखा अस्पतालसहित स्वास्थ्य संस्थामा बिरामीहरूको चाप बढेको स्वास्थ्यकर्मीहरुले बताएका छन्।
बाहिर हिँड्दा धुवा मिसिएको हावा र धूलोको कण आँखाभित्र गएर बिझाउने, पोल्ने र आँखा रातो हुने समस्या लिएर स्वास्थ्य संस्थाहरूमा जानेको संख्या बढेको हो। केही दिनदेखि देखिएको वायु प्रदूषणका कारण उत्पन्न समस्याले सबैभन्दा बढी श्वासप्रश्वासका समस्या भएका जेष्ठ नागरिक र बालबालिकाहरुमा असर पुरयाएको पृथ्वीचन्द्र जिल्ला अस्पताल परासीका मेडिकल सुपरिटेन्डेन्ट डाक्टर मोहम्मद नुरुल होदाले बताए।
श्वासप्रश्वासका जेष्ठ नागरिकहरूमद्य केहीलाई धुवा र धुलोले थप समस्या उत्पन्न गरेकाले अक्सिजन दिएर उपचार गर्नु परेको होदाले बताए।
त्यसैगरी डाक्टर विनोद निता कँडेल आँखा अस्पताल परासीमा पनि दैनिक ३० देखि ४० जना आँखा पोल्ने, बिझाउने र रातो हुने समस्या लिएर आउने गरेको अस्पतालका सूचना अधिकारी धीरेन्द्र सहानीले बताए। अस्पतालमा दैनिक १७० देखि २ सय जनासम्म बिरामीहरू आउने गरेकोमा विगत ४/५ दिनदेखि आँखा पोल्ने र बिझाउने समस्या लिएर आउने बिरामीहरूको संख्या बढ्दै गएको आँखा अस्पतालले जनाएको छ।
डढेलो, कृषकहरुले खेतबारीमा लगाउने आगो, उद्योगहरूबाट उड्ने धुलो र धुवा हावामा मिसन पुग्दा त्यसको असरले स्वास्थ्यमा समस्या उत्पन्न गराएको चिकित्सकहरूले बताएका छन्।
केही दिनदेखि वातावरणमा देखिएको उक्त समस्याबाट बच्नका लागि मास्कको प्रयोग गर्ने र श्वासप्रश्वासका बिरामीहरू सकभर घरबाहिर ननिस्कन चिकित्सकहरूको सुझाव छ।
प्रतिक्रिया दिनुहोस !
