आईसीसीले गर्‍यो पावरप्ले नियममा परिवर्तन, टी–२० खेलमा देखिनेछ प्रभाव

काठमाडौं : अन्तर्राष्ट्रिय क्रिकेट परिषद् (आईसीसी)ले टी–२० क्रिकेटको खेल्ने अवस्थामा केही नियम परिवर्तन गरेको छ। आईसीसीले वर्षा वा अन्य कुनै कारणले प्रभावित टी–२० खेलमा पावरप्ले ओभरलाई पुनः परिभाषित गरेको हो।

यो नियम जुलाई २०२५ देखि टी–२० अन्तर्राष्ट्रियमा लागू हुनेछ। अब यदि मौसम वा अन्य कुनै कारणले टी–२० अन्तर्राष्ट्रिय खेल छोटो पारियो भने पावरप्लेमा ओभरको संख्या स्पष्ट रूपमा तय गरिएको छ। मानौं यदि खेल ८.८ ओभरको छ भने पावरप्ले २.२ ओभरको हुनेछ। यस अवधिमा, केवल दुई फिल्डर ३०–गज सर्कल बाहिर रहन सक्छन्।  

पहिले ८.८ ओभरको खेलमा पावरप्ले २ ओभरको हुन्थ्यो। ९ ओभरको इनिङमा पावरप्ले ३ ओभरको हुन्थ्यो। अब यदि वर्षा वा अन्य कारणले गर्दा खेल ५.५ ओभरको छ भने पावरप्ले १.३ ओभरको हुनेछ। यदि खेल ६ ओभरको छ भने पावरप्ले १.५ ओभरको हुनेछ। 

वर्षाले प्रभावित खेलमा पावरप्ले ओभर 

 चोटसँग सम्बन्धित नियम 

यसैबीच आईसीसीले कन्कसन नियमहरूमा पनि परिवर्तन गरेको छ। आईसीसीले सबै टोलीलाई खेल सुरु हुनुभन्दा पहिले कन्कसन प्रतिस्थापनको लागि ५ जना खेलाडी मनोनयन गर्न निर्देशन दिएको छ।

यसमा एक विकेटकिपर, एक ब्याट्सम्यान, एक फास्ट बलर, एक स्पिनर र एक अलराउन्डर हुनुपर्छ। एउटै खेलाडीलाई एकभन्दा बढी भूमिकामा मनोनयन गर्न सकिनेछ।  जस्तै अलराउन्डरलाई ब्याट्सम्यान र बलर दुवैको रूपमा मनोनयन गर्ने। यद्यपि, यदि त्यो अलराउन्डरले ब्याट्सम्यानको ठाउँ लिन्छ भने रेफ्रीले उसलाई बलिङ गर्नबाट रोक्न सक्छ।  यदि उसले बलरको ठाउँ लिन्छ भने उसलाई ब्याटिङ गर्नबाट रोक्न सकिनेछ। 

यदि विदेशी टोलीसँग १४ सदस्यीय टोली छ र थप खेलाडी उपलब्ध छैनन् भने प्लेइङ–११ बाहिरका तीन खेलाडी मनोनित गर्न सकिन्छ।  ती मध्ये २ खेलाडीलाई दुई भूमिकाका लागि मनोनित गर्न सकिन्छ। यदि उपलब्ध खेलाडी त्यो देशमा उपस्थित छ र टोलीको लागि खेल्न योग्य छ भने उसलाई पनि मनोनित गर्न सकिन्छ।  

बलमा थुक प्रयोग

आईसीसीका अनुसार कुनै पनि पदार्थ (जस्तै थुक) प्रयोग गरेर बलको अवस्था परिवर्तन गर्न खोजिएको पाइयो भने बल अनिवार्यरूपमा बदलिने छ। कुनै टोलीले जानाजान थुक प्रयोग गरेर बल बदल्न खोज्न सक्ने सम्भावना रहेकाले यो नियमले त्यसलाई रोक्नेछ।

आईसीसीका अन्य नयाँ नियम 

बल परिवर्तन गर्ने निर्णय पूर्णतया अम्पायरमा निर्भर गर्ने– बल पूर्ण रूपमा भिजेको वा बिग्रिएको अवस्थामा मात्र परिवर्तन गरिनेछ र यो निर्णय अम्पायरहरूले लिनेछन्।

नो–बलमा क्याच जाँच गरिने– यदि क्याच सही छ भने ब्याटिङ गर्ने टोलीले केवल एक रन पाउनेछ। दौडिएर लिइएको रनलाई विचार गरिने छैन।

छोटो रन लिएमा पाँच रनको जरिवाना लाग्ने– यदि कुनै ब्याट्सम्यानले छोटो रन लिएमा ब्याटिङ गर्ने टोलीले पाँच रनको जरिवाना तिर्नुपर्नेछ। साथै, फिल्डिङ टोलीले कुन ब्याट्सम्यान स्ट्राइकमा हुने भनेर निर्णय गर्नेछ।

घरेलु क्रिकेटमा पूर्णकालीन प्रतिस्थापनको व्यवस्था–गम्भीर घाइते खेलाडीको स्थानमा पूर्णकालीन प्रतिस्थापनको नियम बनाइएको छ। प्रतिस्थापन खेलाडी कन्कसन प्रतिस्थापनको हकमा जस्तै हुनुपर्छ।