गोरखा : हिमाली भेगका एक घाइते दुई दिनदेखि उपचार नपाएर गाउँमै छटपटाइरहेका छन् । बाटोमा हिँडिरहेका बेला भीरबाट झरेको ढुंगा लागेर घाइते भएका चुमनुब्री गाउँपालिका ६ चुम्चेतका ङुइटुप लामा उपचार अभावमा गाउँमै पीडा भोग्न बाध्य भएका हुन् ।
‘छेकम्पार जान लाग्दा रेन्जोम भन्ने ठाउँमा अस्ति बेलुका भीरबाट झरेको ढुंगा लागेर खुट्टा भाँचिएको रहेछ’,घाइतेका आफन्त गोपाल लामाले भने,‘देब्रेखुट्टा कच्याकुचुक भएको छ । हिँजो दिनभर गाउँलेहरूले पाँचघण्टा बोकेर घरमा ल्याए । गाउँकै हेल्थपोस्टमा पट्टी बाँधेर राखेको छ । अब ठूलो अस्पताल लैजाने कसरी ? हेलिकोप्टरमा लैजान तीन लाख बढी धेरै भन्छ । त्यही पनि भनेको बेलामा पाइँदैन ।’
गाउँमा चाहिएको बेला फोन पनि नचल्ने उनको गुनासो छ । ‘यस्तो दु:खको बेला गाउँमा फोन पनि चल्दैन,नेट पनि राम्रो छैन’,उनले भने,‘काठमाडौंतिर आफन्तहरूलाई,सांसदहरूलाई यसो हारगुहार गरौँ भने पनि गाह्रो छ हामीलाई ।’
चुमनुब्री गाउँपालिका- ३ सम्म मात्र मोटरबाटो पुगेको छ । तर,बर्खाका बेला त्यहाँसम्म गाडी चल्दैन । उत्तरी गोरखा जाने सडकको सोतीसम्म मात्र सवारी साधन चल्छ । ‘यहाँबाट बोकेर सोतीसम्म पुग्न तीन दिन लाग्छ’, गोपालले भने,‘बर्खाको बेला छ । घाइतेलाई डोकोमा बोकेर सोती पुर्याउन सकिँदैन । सांसद राजेन्द्र बजगाईँलाई हेलिकोप्टरको व्यवस्था गरिदिन अनुरोध गरेको छु । हेलिकोप्टर पाइयो भने उपचार होला ।’ नत्र घाइते घरमै छटपटाएर बस्नुको विकल्प छैन।'
प्रतिक्रिया दिनुहोस !
