नुवाकोट : सशस्त्र द्वन्द्वका क्रममा ज्यान गुमाएका नुवाकोटको एक व्यक्तिको जन्मस्थानमा सालिक निर्माण गरिएको छ।
विदुर नगरपालिका-११ गेर्खुमा ‘जनयुद्धका शहीद’ जङ्गबहादुर प्याकुरेलको २३ औं स्मृतिमा उनको जन्मस्थानमा अर्धकदको सालिक निर्माण गरिएको हो। नवनिर्मित उक्त सालिकको बाग्मती प्रदेशसभा सदस्य रामप्रसाद ढुङ्गानाले अनावरण गरे।
उनले देशमा संविधान, परिवर्तन र गणतन्त्रका लागि प्याकुरेलले योगदान दिएको र सधैं अमर रहिरहेको स्मरण गरे। जनयुद्धमा होमिएका प्याकुरेलले २०५९ कात्तिक २३ गते धादिङको थाक्रे गाउँपालिका-२ सिम्लेमा सहादत प्राप्त गरेका थिए।
विदुर नपाको कुल पाँच लाख रुपैयाँको लागतमा सालिकसहितको संरचना निर्माण गरिएको हो। २०३३ साउन ३ गते जन्मिएका प्याकुरेलले २६ वर्षको उमेरमा सहादत प्राप्त गरेका थिए।
प्रतिक्रिया दिनुहोस !
