स्याङ्जा : पाठेघरको मुखको क्यान्सर हुनबाट जोगाउने उद्देश्यले फागुनको पहिलो साता स्याङ्जाका किशोरीलाई एचपीभी खोप लगाइने भएको छ ।फागुन ४ र ५ गते जिल्लाभरका १,७९१ किशोरीलाई ‘ह्युमन पापिलोमा भाइरस’ (एचपीभी) खोप लगाइने भएको जनस्वास्थ्य कार्यालय स्याङ्जाले जनाएको छ ।
खोप लगाउनेमध्ये १,७९० जना विद्यालय जाने किशोरी हुन् भने एक जना विद्यालय नजाने अर्जुनचौपारीका किशोरी रहेको कार्यालयले जनाएको छ ।स्याङ्जाका २३४ विद्यालयको कक्षा ६ मा अध्ययनरत छात्रा र विद्यालय नगएकाको लागि १० वर्ष उमेर समूहका किशोरीलाई सो खोप दिइने भएको छ । खोपका लागि विद्यालयमै खोप केन्द्र स्थापना गरी लगाइने भएको छ ।
अघिल्लो वर्ष खोप लगाउन छुटेका अहिले कक्षा ७ देखि १० सम्मका अध्ययनरत छात्रा र विद्यालय नजाने ११ देखि १४ वर्ष उमेर समूहका किशोरीलाई पनि समेटिने जनस्वास्थ्य कार्यालय प्रमुख रामबहादुर नेपालीको भनाई छ ।
जिल्लाका ११ वटै स्थानीय पालिकाभर २३४ स्वास्थ्यकर्मी र त्यतिकै संख्यामा स्वयंसेवक परिचालन गरिने भएकोे सूचना अधिकारी विनोदप्रसाद भट्टले जानकारी गराए । खोप लगाउन छुटेका लक्षित बर्गलाई थप एक सातासम्म समेट्ने व्यवस्था गरिएको पनि उनले बताए ।
जनस्वास्थ्य कार्यालयका अनुसार, पुतलीबजार नगरपालिकाका २९५, वालिङका ४०४, भीरकोटका १६९, गल्याङका २०१, चापाकोटका १६२ जना किशोरीलाई खोप दिइने भएको छ । यसैगरी, फेदीखोला गाउँपालिकाका १०३, आँधीखोलाका ८६, अर्जुनचौपारीका १०९, बिरुवाका ७२, हरीनासका ८० र कालीगण्डकीका ११० किशोरीलाई खोप लगाइने हो ।
नेपालमा पाठेघरको मुखको क्यान्सर महिलामा देखिने क्यान्सरमध्ये दोस्रो स्थानमा रहेको स्वास्थ्यकर्मीका भनाई छन् । पाठेघरको मुखको क्यान्सरको जोखिम बढाउने मुख्य कारण ह्युमन पापिलोमा भाइरस संक्रमण रहेकाले त्यसको विरुद्ध खोप लगाउनुपर्ने भएको हो । नेपालमा वार्षिक २ हजार नेपाली महिलाको पाठेघरको मुखको क्यान्सरबाट मृत्यु हुने गरेको बताइएको छ ।
एचपीभी खोप लगाउँदा एचपीभीको संक्रमणबाट हुने मुखको क्यान्सरलाई ७० प्रतिशतले घटाउन सहयोग पुग्ने र ९८ प्रतिशतभन्दा बढी खोपको प्रभावकारिता रहेको स्वास्थ्यकर्मीहरुले बताउँदै आएका छन् । गत बर्ष अभियानका रुपमा लगाउँदै आएको एचपीभी खोप यस बर्षदेखि नियमित रुपमा रुपमा लगाइने भएको हो ।
प्रतिक्रिया दिनुहोस !
