धादिङ : धादिङको नेत्रावती डबजोङ गाउँपालिका–५ कटुन्जेमा निर्माणाधीन स्वास्थ्य चौकी भवन लामो समयदेखि अधुरै अवस्थामा रहेको छ । आर्थिक वर्ष २०७६ मा टेण्डर भई निर्माण सुरु गरिएको उक्त स्वास्थ्य चौकी हालसम्म पूर्ण रूपमा सम्पन्न हुन सकेको छैन ।
स्वास्थ्य चौकी भवनको मात्रै लागत २ करोड ७० लाख ३१ हजार ७ सय ६९ रुपैयाँ अनुमान गरिएको थियो । काठमाडौँको बानेश्वर स्थित रविना-अविशा-विकोन जेभीले २०७७ फागुन २० गते ठेक्का सम्झौता गरी २०८१ असोज ७ गतेभित्र निर्माण सम्पन्न गर्ने लक्ष्यका साथ काम सुरु गरेको थियो ।
ठेक्का सम्झौता अनुसार निर्माण व्यवसायीसँग ७ करोड ६२ लाख ३५ हजार ८ सय ४१ रुपैयाँमा सम्झौता गरिएको थियो । तर तोकिएको समय सीमा सकिए पनि अहिलेसम्म जम्मा ५५ प्रतिशत मात्रै भौतिक प्रगति भएको छ भने वित्तीय प्रगति ३६ प्रतिशत मात्रै भएको सघन सहरी तथा भवन निर्माण आयोजना ले जनाएको छ ।
आयोजनाका अनुसार हालसम्म स्वास्थ्य चौकी भवन निर्माणमा २ करोड ७२ लाख ८९ हजार ५ सय ४१ रुपैयाँ खर्च भइसकेको छ । निर्माण सम्पन्न गर्ने समय घर्किसक्दा पनि निर्माण व्यवसायीले अहिलेसम्म म्याद थपका लागि निवेदन नदिएको र सम्पर्कमा समेत नआएको आयोजनाले जनाएको छ ।
निर्माण व्यवसायी सम्पर्कमा नआएमा ठेक्का सम्झौता नै रद्द गर्नुपर्ने अवस्था आउन सक्ने चेतावनी आयोजनाले दिएको छ । निर्माण व्यवसायी आएर म्याद थपका लागि निवेदन दिएमा जरिवानासहित म्याद थप हुन सक्ने सघन सहरी तथा भवन निर्माण आयोजनाका प्रमुख सशिन्द्र घिमिरेले बताए ।
स्वास्थ्य चौकी भवन समयमै निर्माण नहुँदा पुरानै जीर्ण भवनबाट सेवा सञ्चालन गर्नुपरेको छ । नयाँ भवन नहुँदा सेवाग्राही र स्वास्थ्यकर्मी दुवैले सास्ती खेप्नुपरेको कविता बोगटी बताउँछिन् । उता, आयोजना र ठेकेदारबीच समन्वयको अभावका कारण निर्माणमा ढिलाइ भएको भन्दै स्थानीय जनप्रतिनिधिहरूले पनि चिन्ता व्यक्त गरेका छन् ।
निर्माण कम्पनी र सरोकारवाला निकायले छिटो काम अघि बढाउनु पर्ने ठाकुर गुरुङको भनाइ छ । स्वास्थ्य जस्तो संवेदनशील क्षेत्रको पूर्वाधार वर्षौँसम्म अधुरो रहँदा स्थानीय बासिन्दा भने अझै पनि नयाँ भवनको प्रतीक्षामा छन् ।
प्रतिक्रिया दिनुहोस !
