भारतीय विदेश मन्त्रालयले भन्यो- नेपालसँग हाम्रो सम्बन्ध अद्वितीय र बहुआयामिक छ

काठमाडौं : भारतीय विदेश मन्त्रालयले भारत र नेपालबीच अद्वितीय र बहुआयामिक साझेदारी रहँदै आएको बताएको छ। बिहीबार साप्ताहिक प्रेस ब्रिफिङमा सञ्चारकर्मीले सोधेको प्रश्नको जवाफ दिँदै विदेश मन्त्रालयका प्रवक्ता रणधीर जयसवालले भारत र नेपालबीचको साझेदारीले आगामी दिनमा पनि गतिशीलता पाउने बताए।

'यहाँहरूलाई थाहा नै छ भारत र नेपालबीच एक अद्वितीय र बहुआयामिक साझेदारी तथा सम्बन्ध रहेको छ। आगामी दिन तथा वर्षहरूमा यो गतिशीलता अझ सुदृढ र प्रगाढ हुँदै जाने हामीले अपेक्षा गरेका छौं,' उनले भने।

प्रवक्ता जयसवालले भारत सरकारले नेपालको नयाँ सरकारसँग मिलेर काम गर्ने बताए। उनले प्रधानमन्त्री नरेन्द्र मोदीले राष्ट्रिय स्वतन्त्र पार्टीका सभापति रवि लामिछाने र वरिष्ठ नेता बालेन्द्र शाहसँग टेलिफोन संवाद गरेको बताउँदै भारत साझा शान्ति, प्रगति र समृद्धि चाहेको बताए।

'नेपालमा सफलतापूर्वक निर्वाचन सम्पन्न भएपश्चात हामीले त्यसको स्वागत गरेका छौं। हाम्रा प्रधानमन्त्रीज्यूले पनि टेलिफोन संवादमार्फत रास्वपाले हासिल गरेको शानदार सफलताका लागि बधाई दिनुभएको छ। प्रधानमन्त्रीज्यूले एक घनिष्ठ मित्र र छिमेकीका रूपमा नेपालका जनता र नयाँ सरकारसँग मिलेर काम गर्न तथा साझा शान्ति, प्रगति र समृद्धिको नयाँ उचाइ हासिल गर्न भारत सदैव प्रतिबद्ध रहेको कुरा बताउनुभएको छ,' उनले भने।