काठमाडौं : प्रतिनिधिसभाको आज बस्ने भनिएको बैठक स्थगित भएको छ । शुक्रबार दिउँसो १ बजेका लागि तय गरिएको बैठक विशेष कारणले प्रतिनिधिसभा नियमावली २०८३ को नियम ६ को उपनियम ३ वमोजिम स्थगित गरिएको संसद सचिवालयले जनाएको छ । सभामुख डोलप्रसाद (डीपी) अर्यालले आगामी बैठक शनिबार (भोलि) ११ बजे बस्ने गरी तय गरेको संसद सचिवालयले जनाएको छ ।
यसअघि बिहीबार तय गरिएको बैठक विशेष कारण देखाउँदै सूचना टाँसेर स्थगित गरिएको थियो । सत्तारुढ रास्वपाका अधिकांश सांसदहरू महाधिवेशनका लागि चितवनमा रहेकाले सदन प्रभावित भएको छ । आजको बैठकमा प्रधानमन्त्रीको तर्फबाट कानून, न्याय तथा संसदीय मामिला मन्त्री सोविता गौतमले ‘महालेखापरीक्षकको ६२औं वार्षिक प्रतिवेदन, २०८३’ पेश गर्ने कार्यक्रम रहेको थियो ।
बैठकमा सार्वजनिक खरिद (दोस्रो संशोधन) विधेयक, २०८३, सम्पत्ति शुद्धीकरण (मनि लाउन्डरिङ) निवारण (तेस्रो संशोधन) विधेयक, २०८३, सहकारी (पहिलो संशोधन) विधेयक, २०८३ तथा स्वास्थ्य विज्ञान प्रतिष्ठानसम्बन्धी केही नेपाल ऐनलाई संशोधन गर्ने विधेयक, २०८३ प्रस्तुत गर्न अनुमति माग्ने प्रस्ताव र विधेयक प्रस्तुत गरिने संसद सचिवालयले कार्यसूची सार्वजनिक गरेको थियो ।
त्यस्तै आर्थिक विधेयक, २०८३ माथि संशोधनसहित छलफल हुने तथा प्राप्त संशोधनहरूलाई निर्णयार्थ प्रस्तुत गरिने छ । अर्थमन्त्री डा. स्वर्णिम वाग्लेले आर्थिक विधेयक पारित गरियोस् भन्ने प्रस्ताव पनि पेश गर्ने कार्यक्रम थियो । बैठकमा राष्ट्र ऋण उठाउने विधेयक, २०८३ माथि दफाबार छलफल, संशोधनहरूमाथि निर्णय तथा उक्त विधेयक पारित गरियोस् भन्ने प्रस्ताव पनि अर्थमन्त्रीले प्रस्तुत गर्ने कार्यसूची रहेको संसद् सचिवालयले जनाएको थियो ।
प्रतिक्रिया दिनुहोस !
