विराटनगर : मोरङको रंगेलीमा पहिलो पटक आमाको नामबाट नेपाली नागरिकता वितरण सुरु भएको छ । जिल्ला प्रशासन कार्यालय मोरङको पहलमा इलाका प्रशासन कार्यालय रंगेलीमार्फत सुरु गरिएको सेवाले लामो समयदेखि भोग्दै आएको नागरिकताको झन्झटिलो प्रक्रियामा महत्वपूर्ण सहजता ल्याएको स्थानीयले बताएका छन् ।
यसअघि आमाको नामबाट नागरिकता लिन सेवाग्राहीहरूलाई अनिवार्य रूपमा विराटनगर पुग्नुपर्ने बाध्यता थियो । भौगोलिक दूरी, खर्च र समयको कारण धेरै नागरिकहरू अधिकारबाट वञ्चित हुने अवस्था रहेको थियो । यही समस्यालाई मध्यनजर गर्दै प्रमुख जिल्ला अधिकारी (सीडीओ) युवराज कट्टेल स्वयं रंगेली नै पुगेर सेवा प्रवाह सुरु गरेका हुन् ।
कट्टेलले नागरिकलाई आधारभूत अधिकार दिलाउन प्रशासन नागरिककै घरदैलोमा पुग्नुपर्ने नीति अनुसार काम भइरहेको बताए ।
रंगेलीबाट दाजुभाइले पहिलो पटक यो सेवा लिएका छन् । रंगेली नगरपालिका–६ का कपिल कर्मकार र विदुर कर्मकार आमाको नामबाट नागरिकता प्राप्त गर्ने पहिलो सेवाग्राही बनेका हुन् । बुवाको निधन भइसकेका कारण उनीहरूले आमा फुलोदेवी मिस्त्रीको नामबाट नागरिकता पाएका छन् । नागरिकता प्राप्त गरेपछि उनीहरूले प्रशासनप्रति कृतज्ञता व्यक्त गर्दै धन्यवाद दिएका छन् । पहिले नै बुवाको मृत्यु भइसकेको र आमाको नामबाट नागरिकता जारी नहुने गरेका कारण आफूहरु नागरिकताबाट लामो समयसम्म वञ्चित हुनु परिरहेको गुनासो उनीहरुको थियो ।
नागरिकता हस्तान्तरण कार्यक्रममा सहायक प्रमुख जिल्ला अधिकारी पवनराज कोइराला, इलाका प्रशासन कार्यालय रंगेलीका प्रमुख रोशन अधिकारीसहित अन्य कर्मचारीहरूको उपस्थिति थियो । कार्यक्रमलाई सफल बनाउन इलाका प्रशासनका कर्मचारीहरूले सक्रिय समन्वय गरेका थिए ।
रंगेली क्षेत्रबाट आमाको नाममा नागरिकता लिन आवेदन दिएका अन्य २१ जनाको पनि स्वीकृति भइसकेको छ । इलाका प्रशासन कार्यालयले उनीहरूलाई पनि चाँडै नागरिकता वितरण गर्ने तयारी भइरहेको जनाएको छ । आमाको नामबाट नागरिकता वितरण सुरु भएसँगै रंगेली क्षेत्रका बासिन्दामा उत्साह देखिएको छ । लामो समयदेखि कानुनी पहिचान खोज्दै संघर्ष गरिरहेका नागरिकहरूका लागि यो कदम राहत र अधिकार सुनिश्चितताको दिशामा महत्वपूर्ण प्रगति मान्नुपर्ने प्रजिअ कट्टेलको भनाइ छ ।
प्रतिक्रिया दिनुहोस !
