विराटनगर : मोरङको बूढीगंगा गाउँपालिका–४ मा बुधबार दिउँसो भीषण आगलागी हुँदा मुसहर बस्ती जलेर खरानी भएको छ । आगोले १५ वटाभन्दा बढी घर जलेर ध्वस्त भएको अनुमान गरिएको छ । गोकुवा चोकबाट पूर्वतर्फ रहेको बस्तीमा दिउँसो करिब २ बजेतिर अचानक आगलागी सुरु भएको प्रहरीले जनाएको छ ।
प्रहरीका अनुसार आगो तीव्र गतिमा फैलिँदा बस्तीका सबैजसो घरहरू पूर्णरूपमा जलेर खरानी भएका छन् । १५ भन्दा बढी घर जलेर खरानी भएको प्रारम्भिक अनुमसान गरिए पनि क्षतिको यकिन विवरण आइसकेको छैन । बस्तीका घरहरू प्रायः फुसको छाना र टाटीबेराले बनेका भएकाले आगोले छिट्टै विकराल रूप लिएको स्थानीयको भनाइ छ ।
आगलागी नियन्त्रणका लागि इलाका प्रहरी कार्यालय नेमुवाबाट सई अशोक कार्की र प्रहरी कार्यालय मोरङबाट वरिष्ठ सई राजेन्द्र कटवालको नेतृत्वमा टोली परिचालन गरिएको थियो । त्यसैगरी विराटनगर महानगरपालिकाका दमकल,सुरक्षाकर्मी र स्थानीय बासिन्दाको सक्रिय प्रयासका बाबजुद करिब ४५ मिनेटपछि आगो नियन्त्रणमा लिइएको प्रहरीले जनाएको छ ।
आगो नियन्त्रणमा आए पनि बस्तीका अधिकांश घर पूर्ण रूपमा जलेर नष्ट भइसकेका छन् । आगलागीको कारण हालसम्म खुल्न सकेको छैन । प्रहरीले घटनाको थप अनुसन्धान भइरहेको जनाएको छ ।
घटनापछि बस्तीका पीडित परिवारहरू बिचल्लीमा परेका छन् । भूमिहीन र दैनिक ज्यालादारीमा निर्भर मुसहर समुदायका परिवारहरूको आश्रय नै नष्ट भएपछि उनीहरू खुला आकाशमुनि बस्न बाध्य भएका छन् । घरसँगै लत्ताकपडा, अन्नपात र दैनिक प्रयोगका सामग्री जलेपछि पीडितहरू अत्यन्तै कठिन अवस्थामा पुगेका हुन् ।
आगलागीपछिको दृश्य अत्यन्तै दर्दनाक बनेको छ । बस्तीभरि रुवाबासी चलेको छ भने बालबालिका, वृद्धवृद्धा र महिलाहरू अत्यन्तै त्रासमा रहेका छन् । सरोकारवालाले तत्काल राहत तथा पुनःस्थापनाको माग गर्न थालेका छन् ।
यस घटनाले अति विपन्न समुदायका असुरक्षित बसोबास र विपद् व्यवस्थापनको कमजोर तयारीलाई उजागर गरेको छ । समयमै प्रभावकारी राहत,अस्थायी आवास र दीर्घकालीन पुनःस्थापनाको व्यवस्था नगरे पीडित परिवारहरूको अवस्था झन् जटिल बन्ने सरोकारवालाले बताएका छन् ।
प्रतिक्रिया दिनुहोस !
