काठमाडौं : प्रधानमन्त्री कप एक दिवसीय राष्ट्रिय क्रिकेट प्रतियोगिता २०२६ मा नेपाल पुलिस क्लबले पहिलो जित दर्ता गरेको छ ।विभागीय डर्बीको खेलमा नेपाल पुलिस क्लबले एपीएफ क्लबमाथि १८५ रनको फराकिलो जित दर्ता गरेको हो ।
नेपाल पुलिस क्लबको यो पहिलो जित हो भने एपीएफको यो पहिलो हार हो । माथिल्लो मूलपानी मैदानमा टस हारेर ब्याटिङ गरेको पुलिसले निर्धारित ५० ओभरमा ९ विकेट गुमाउँदै ३५५ रन बनाएको थियो । पुलिसले दिएको ३५६ रनको बलियो लक्ष्य पछ्याएको एपीएफ ४४ ओभरमा १७० रन बनाउँदै अलआउट भयो ।
एपीएफको लागि नन्दन यादवले सर्वाधिक ४४ रन बनाए । उनले ५५ बलमा समान ३ चौका र ३ छक्का प्रहार गरे। कमलसिंह ऐरीले ३५ रन बनाए । आसिफ शेखले १८, कप्तान रोहित पौडेलले ११, सन्दीप जोराले २४ र पुरन विकले २० रन बनाए । एपीएफलाई सस्तैमा रोक्न पुलिसका बायाँ हाते स्पिनर ललित राजवंशीले सर्वाधिक ३ विकेट लिए । करण केसी, रासिद खान र दिनेश खरेलले २–२ विकेट लिए। सागर ढकालले १ विकेट लिए ।
त्यसअघि, ब्याटिङ गरेको पुलिसका लागि शंकर रानाले सर्वाधिक ६१ रन बनाए । उनले ५४ बलमा ५ चौका र ४ छक्का प्रहार गरे । ओपनर ब्याटर दिनेश खरेलले ६० रन बनाए । अमित श्रेष्ठले ३९ रन बनाए । रासिद खान ४४ रन बनाए । कप्तान आरिफ शेखले ५० रनको अर्धशतकीय पारी खेले । दिलसद अलि ५१ रनमा अविजित रहे ।
एपीएफको लागि कमलसिंह ऐरी र अमरसिंह रौतेलाले २–२ विकेट लिए । युवराज खत्री, कप्तान रोहित पौडेल र नन्दन यादवले १–१ विकेट लिए । दुवै टोलीको यो दोस्रो खेल थियो । एपीएफले पहिलो खेलमा बागमती प्रदेशलाई ७१ रनले पराजित गरेको थियो । पुलिसले भने पहिलो खेल त्रिभुवन आर्मीसँग हार बेहोरेको थियो । पुलिस आर्मीसँग २२ रनले पराजित भएको थियो ।
प्रतिक्रिया दिनुहोस !
