विराटनगर : कोशी प्रदेशमा बर्डफ्लू संक्रमण पुष्टि भएका तीन जिल्लाबाट पंक्षीजन्य वस्तु अन्यत्रका जिल्लामा ढुवानीमा पूर्ण रोक लगाइएको छ । मोरङ, सुनसरी र झापामा बर्डफ्लू फैलिएको पाइएपछि कुखुराजन्य उत्पादनको ओसारपसार र बिक्री वितरणमा कडाइ गरिएको हो ।
संक्रमण थप फैलिन नदिन सम्बन्धित जिल्लाबाट कुखुरा, अण्डा, मासु र सुली (पोल्ट्रीजन्य फोहोर) ढुवानीमा तत्कालका लागि पूर्ण प्रतिबन्ध लगाइएको स्थानीय प्रशासनहरुले जनाएका छन् । मोरङका सहायक प्रमुख जिल्ला अधिकारी पवनराज कोइरालाका अनुसार प्रयोगशाला परीक्षणबाट विभिन्न पोल्ट्री फार्ममा बर्डफ्लू पुष्टि भएपछि संक्रमण नियन्त्रणलाई उच्च प्राथमिकतामा राखेर आपतकालीन निर्णय गरिएको छ ।
उनका अनुसार प्रभावित जिल्लाबाट सीमा जोडिएका आसपासका क्षेत्रसम्म संक्रमण फैलिन सक्ने जोखिमलाई मध्यनजर गर्दै थप कडाइ गरिएको छ । निर्णयअनुसार संक्रमण देखिएका मोरङ, झापा र सुनसरीबाट सीमा जोडिएका धनकुटा, पाँचथर, इलाम, उदयपुर र सप्तरीतर्फ कुखुरा, अण्डा, मासुजस्ता पंक्षीजन्य वस्तुको ओसारपसार र बिक्री वितरण पूर्ण रूपमा रोकिएको हो । प्रतिबन्ध कम्तीमा दुई सातासम्म लागू हुनेछ ।
सहायक प्रजिअ कोइरालाले गृह मन्त्रालयको विपद् जोखिम न्यूनीकरण तथा पुनर्लाभ शाखाबाट प्राप्त निर्देशन र पशुसेवा विभागमा बसेको सरोकारवालाको बैठकको निर्णयअनुसार तत्काल नियन्त्रणात्मक कदम चालिएको जानकारी दिए । उनका अनुसार संक्रमणको चक्र तोड्नु नै बर्डफ्लू नियन्त्रणको मुख्य उपाय भएकाले आवतजावत र व्यापारिक ढुवानी रोक्नुपर्ने अवस्था आएको हो ।
प्रशासनले संक्रमण देखिएको फार्म वरपर २० मिटरको क्षेत्रलाई संकटग्रस्त क्षेत्र घोषणा गरी त्यहाँको आवतजावत पूर्ण रूपमा नियन्त्रणमा राखेको छ । जोखिमको दायरा बढ्दै गएको भन्दै स्थानीय प्रशासन र पशुसेवा निकायहरू सक्रिय रूपमा अनुगमन तथा नियन्त्रणमा खटिएका छन् । सुरुमा बर्डफ्लु संक्रमण मोरङमा देखिएको थियो भनेपछि झापा र सुनसरीका विभिन्न पोल्ट्री फार्महरूमा पनि संक्रमण पुष्टि भएको हो । हालसम्म तीन जिल्लाका १३ वटा पोल्ट्री फार्ममा बर्डफ्लु देखिएको पशु प्राविधिकहरुले बताए ।
संक्रमण भारततर्फ पनि फैलिँदै गएको संकेत देखिएपछि सीमा नाकामा उच्च सतर्कता अपनाइएको छ । सीमावर्ती क्षेत्र हुँदै रोग फैलिन सक्ने सम्भावनालाई ध्यानमा राख्दै स्थानीय प्रशासनले निगरानी बढाएको हो । पशुसेवा विभागका अनुसार बर्डफ्लू नियन्त्रणका लागि संक्रमणको श्रृंखला रोक्नु अत्यावश्यक हुन्छ । त्यसका लागि संक्रमित क्षेत्रबाट उत्पादन हुने सबै प्रकारका पंक्षीजन्य वस्तुको ढुवानी रोक्नुपर्ने बाध्यता रहेको विभागको भनाइ छ ।
यदि यो चक्र तोड्न नसकिएमा संक्रमण अन्य जिल्लामा छिटो फैलिन सक्ने जोखिम रहन्छ । प्रशासनले किसान, व्यवसायी तथा उपभोक्तालाई उच्च सतर्कता अपनाउन आग्रह गरेको छ । कुनै पनि फार्ममा कुखुरा अस्वाभाविक रूपमा मर्न थाले, रोगको लक्षण देखिए वा शंका लागे तत्काल सम्बन्धित स्थानीय निकाय वा पशु प्राविधिकलाई जानकारी दिन आग्रह गरिएको छ ।
कुखुरापालन व्यवसायमा संलग्न किसानहरूलाई जैविक सुरक्षा मापदण्ड कडाइका साथ पालना गर्न, फार्ममा अनावश्यक व्यक्तिको प्रवेश रोक्न र सफाइ तथा कीटाणु नियन्त्रणमा विशेष ध्यान दिन निर्देशन दिइएको छ । स्थानीय तहहरूलाई जनचेतना फैलाउने, नियमित अनुगमन गर्ने र संक्रमण नियन्त्रणमा आवश्यक समन्वय गर्न भनिएको छ ।
पूर्वी नेपालमा फैलिँदै गएको बर्डफ्लूको असर कुखुरापालन व्यवसायमा प्रत्यक्ष देखिन थालेको छ । बजारमा कुखुरा र अण्डाको आपूर्तिमा अस्थिरता आउने सम्भावना देखिएको छ भने व्यवसायीहरूले आर्थिक क्षति बेहोरिरहेका छन् । विज्ञहरुले समयमै नियन्त्रण गर्न नसकिएमा यो संक्रमणले कृषि तथा पशुपंक्षी क्षेत्रसँगै जनस्वास्थ्यमा समेत गम्भीर असर पार्ने चेतावनी दिएका छन् ।
नियन्त्रणका लागि सबै सरोकारवालालाई जिम्मेवार भएर सहयोग गर्न स्थानीय प्रशासनहरुले आग्रह गरेका छन् । अवस्थालाई नियन्त्रणमा राख्न सरकार, स्थानीय प्रशासन, पशुसेवा विभाग र निजी क्षेत्रबीच समन्वय बढाइएको छ । संक्रमण फैलिन नदिन दुई हप्तासम्म लागू गरिएको प्रतिबन्धलाई कडाइका साथ कार्यान्वयन गरिने मोरङका सहायक प्रजिअ कोइरालाको भनाइ छ ।
प्रतिक्रिया दिनुहोस !
