निलम्बनपछि एन्फाको पत्रकार सम्मेलन : फिफा र एएफसीसँग छलफल गर्दै चुनाव स्थगित
चैत १३, २०८२ शुक्रबार १५:२०:५६
काठमाडौं : राष्ट्रिय खेदलकुद परिषद (राखेप) को निलम्बनपछि अखिल नेपाल फुटबल संघ (एन्फा) ले पत्रकार सम्मेलन गरेको छ । झापामा चुनाव गराउन गएको कार्यसमितिले राखेपको निलम्बन पत्र प्राप्त भएपछि सम्पूर्ण सदस्यहरुसहित पत्रकार सम्मेलन गरेको हो ।
एन्फाले तेस्रो पटक आफ्नो संघीय चुनाव स्थगित गरेको हो । तेस्रो पटक चुनाव स्थगित गरेको एन्फाले एएफसी र फिफासँग छलफल गरेर चुनाव स्थगित गरेको बताएको छ । शुक्रबार पत्रकार सम्मेलन गर्दै एन्फाका महासचिव किरण राईले फिफा र एएफसीसँग समन्वय गर्दै चुनाव स्थगित गरेको बताएका हुन् ।
उनले भने, ‘हामीले बारम्बार राखेपको पत्रको उत्तर दिँदै आएका थियौं तर पनि उहाँँहरुले हामीलाई निलम्बन गर्नुभयो । यो कुरा हामीले फिफा र एएफसीमा जानकारी गराएका थियौं । अब उहाँहरुले नै सरकारी पक्षसँग छलफल गर्ने बताउनु भएको छ ।’ एन्फा निलम्बनमा पर्दा अब हुने महिलाको मैत्रीपूर्ण खेलको लागि महिला टिमको खेल र एएफसी एसियन कप छनोटको लाओससँगको खेलको जिम्मा राखेपले लिनुपर्ने राईले बताए ।
‘नेपाली फुटबल अब भ्याकेन्ट अवस्थामा रहेको छ । अब यसको जिम्मा राखेपले लिनुपर्छ ।’ लाओससँग खेलका लागि स्विकृतिको पत्र आफूहरु निलम्बन हुनुअघि नै राखेप पठाएको एन्फा महासचिव किरण राईले बताए । ‘एएफसी एसियन कप छनोट खेल्न पठाउन हामीले चैत ८ मा नै पत्र पठाएका छौं । लाओससँग खेल खेल्न नेपाली टिम पठाउनु पर्छ भन्ने हामी चाहन्छौं ।’
प्रतिक्रिया दिनुहोस !
