आइपीएल–२०२६ को संस्करण आजबाट, उद्घाटन खेलमा आरसीबी र सनराइजर्स भिड्दै

काठमाडौं : इण्डियन प्रिमियर लिग (आइपीएल) को २०२६ को संस्करण आजदेखि सुरु हुँदैछ । उद्घाटन खेल साविक विजेता रोयल च्यालेन्जर्स ब्याङ्गलोर (आरसीबी) र  सनराइजर्स हैदराबादबीच हुँदैछ । 

यी दुई टोलीको खेल नेपाली समयअनुसार ७ः४५ देखि ब्याङ्गलोरको एम चिन्नस्वामी क्रिकेट स्टेडियममा हुनेछ । आजको खेलमा हैदराबादका लागि कप्तानको भूमिकामा इशान किसन रहने छन् । कप्तान प्याट कमिन्स ढाडको चोटका कारण केही खेल गुमाउने भएपछि किसनले टिमको कप्तानी गर्ने मौका पाएका हुन् । आरसीबीका लागि भने रजत पार्टीदारले नै कप्तानको भूमिका निर्वाह गर्नेछन् । 

१९ औं संस्करणको आइपीएल २०२६ मार्च २८ बाट मे ३१ सम्म चल्नेछ । आइपीएलमा १० वटा टोलीले डबल राउन्ड रोबिन फर्म्याटमा खेल्ने छन् । यसका आधारमा लिगमा जम्मा ७० खेल हुनेछन् । यी खेलहरू १३ वटा भेन्युमा हुनेछन् । पहिलो चरणमा मार्च २८ देखि अप्रिल ११ सम्म २० वटा खेल खेलाइनेछ । त्यसपछि दोस्रो चरणमा अप्रिल १३ देखि मे २४ सम्म ५० वटा लिगका खेलहरु आयोजना हुनेछन् ।

यी खेलहरूमध्ये लिगका खेलहरू आठ वटा डबल हेडर खेलहरू रहेका छन् भने अन्य खेलहरू सिङ्गल हेडरमा खेलाइने छन् । दुई दुई वटा खेल भएको खण्डमा पहिलो खेल ३ः४५ मा सुरु हुनेछ भने दोस्रो खेल साँझ ७ः४५ बाट सुरु हुनेछ । 

आइपीएल २०२६ का १० टिमका कप्तान र प्रशिक्षकहरूः
१. चेन्नाई सुपर किङ्स 
कप्तान : ऋतुराज गाइकवार्ड
प्रशिक्षक : स्टेफन फेल्मिङ

२.दिल्ली क्यापिटल्स्
कप्तान : अक्षर पटेल 
प्रशिक्षक : हेमाङ बडानी 

३. गुजरात टाइटन्स्
कप्तान : शुभमन गिल 
प्रशिक्षक : आशिष नेहेरा 

४. कोलकाता नाइट राइडर्स 
कप्तान : अजिन्क्य रहणे
प्रशिक्षक : अभिषेक नायर 

५. लखनउ सुपर जायन्ट्स
कप्तान : ऋषभ पन्त 
प्रशिक्षक : जस्टिन ल्यान्ङगर

६. मुम्बई इन्डियन्स
कप्तान : हार्दिक पाण्ड्या
प्रशिक्षक : महेला जयवर्धने

७. पन्जाब किङ्स 
कप्तान : श्रेयस अय्यर
प्रशिक्षक : रिक्की पोन्टिङ

८. राजस्थान रोयल्स्

कप्तान : रियान पराग 
प्रशिक्षक : कुमार संगाकारा

९. रोयल च्यालेन्जर्स ब्याङ्गलोर

कप्तान : रजत पाटीदार
प्रशिक्षक : एन्डी फ्लावर

१०. सनराइजर्स हैदराबाद 
कप्तान : इशान किसन- प्याट कमिन्स 
प्रशिक्षक : डेनियल वेटोरी