जेनजी आन्दोलनको फाइदा उठाउँदै फरार भएका दुई थुनुवा पक्राउ

विराटनगर : जेनजी आन्दोलनका क्रममा भएको सुरक्षा अव्यवस्थाको फाइदा उठाउँदै हिरासतबाट फरार भएका दुई जना थुनुवा मोरङको लेटाङबाट पक्राउ परेका छन्।

पक्राउ पर्नेमा लेटाङ नगरपालिका–३ का २४ वर्षीय सुवर्ण राई र २१ वर्षीय सुमन राई रहेका छन्। मोरङ प्रहरीका सूचना अधिकारी एवम् डीएसपी लीलाराज लामिछानेका अनुसार इलाका प्रहरी कार्यालय पथरीबाट खटिएको विशेष टोलीले उनीहरूलाई बिहीबार साँझ गाउँमै लुकिछिपी बसेको अवस्थामा नियन्त्रणमा लिएको हो।

दुवै जना भदौ २४ गते इलाका प्रहरी कार्यालय पथरीको हिरासतबाट फरार भएका थिए । जेनजी आन्दोलनको भिड र अव्यवस्थाको मौका छोपेर फरार भएका उनीहरु लागुऔषध मुद्दाका थुनुवा हुन् । लागुऔषध सम्बन्धी मुद्दामा अनुसन्धान जारी रहेका बेला फरार भएपछि प्रहरीले खोजी गरिरहेको थियो । 

पक्राउ परेका दुवै जनालाई इलाका प्रहरी कार्यालय पथरीको हिरासतमा राखेर थप अनुसन्धान अघि बढाइएको छ । उक्त घटनाकै दिन पथरी प्रहरीको हिरासतबाट अन्य थुनुवासमेत फरार भएका थिए । भागेकाहरुको खोजी जारी राखिएको प्रहरीले जनाएको छ ।