सुनसरी : नेपाल–भारत खुला सीमानाको कारण सुनसरीमा लागुऔषध कारोबार बढ्दै गएको छ । बिहीवार प्रहरीले ठूलो परिमाणको प्रतिबन्धित लागुऔषधनसहित एक जनालाई पक्राउ गरेको छ ।
सुनसरीको हरिनगरा गाउँपालिका–२ भुटाहा बजार क्षेत्रमा जिल्ला प्रहरी कार्यालय सुनसरी र प्रहरी चौकी रामनगर भुटाहाबाट संयुक्त रूपमा खटिएको प्रहरी टोलीले शंका लागेर एक स्कुटर रोकी चेकजाँच गरेको थियो । भुटाहाबाट घुस्कीतर्फ जाँदै गरेको मे ८ प ५८७० नम्बरको स्कुटर जाँच गर्ने क्रममा स्कुटरको डिक्कीभित्रबाट प्रतिबन्धित लागुऔषध ट्रामाडोल ५ हजार क्याप्सुल फेला परेको प्रहरीले जनाएको छ ।
उक्त लागूऔषधसहित स्कुटर चालक हरिनगरा गाउँपालिका–६ बस्ने २१ वर्षीय अबजल अन्सारीलाई नियन्त्रणमा लिइएको छ । उनलाई थप अनुसन्धानका लागि जिल्ला प्रहरी कार्यालय सुनसरीमा राखिएको छ ।
जिल्ला प्रहरी कार्यालय सुनसरीका प्रमुख एसपी केशवकुमार थेबेले पछिल्लो समय नेपाल–भारत खुला सीमानाको फाइदा उठाउँदै लागूऔषध ओसारपसार र कारोबारमा वृद्धि हुँदै गएको बताए । उनले यस्ता गतिविधि नियन्त्रणका लागि सीमावर्ती क्षेत्रमा निगरानी कडा पारि कारोबारीहरुलाई दैनिक पक्राउ गरिरहेको बताए । प्रहरीले सीमावर्ती नाकाहरूमा नियमित चेकजाँच र विशेष अभियान सञ्चालन गर्दै लागुऔषध नियन्त्रणलाई प्राथमिकतामा राखेको एसपी थेबेको भनाई छ ।
प्रतिक्रिया दिनुहोस !
