सिमरा : पथलैया–वीरगञ्ज सडक खण्ड अन्तर्गत बाराको जीतपुरसिमरा उपमहानगरपालिका–९ छातापिपरास्थित सडक पेटीमा गत सोमबार बिहान एक वेवारिसे शव फेला पर्छ । व्यस्त राजमार्गको छेउमै एक पुरुष लडिरहेको अवस्थामा जस्तो देखेपछि स्थानीयले तत्काल प्रहरीलाई जानकारी गराउँछन् ।
ईलाका प्रहरी कार्यालय सिमराबाट प्रहरी निरीक्षक दिवाकर गणेशको नेतृत्वमा प्रहरी टोली घटनास्थल पुग्छ । मृत भेटिएका व्यक्ति पर्साको पटेर्वा सुगौली गाँउपालिका–४ का ३५ वर्षीय पल्टु माझी मुसहर भएको खुल्छ । शवको मुचुल्का गर्ने क्रममा घटना शंकास्पद देखिन्छ । प्रहरीले नजिकैको सिसिटिभी क्यामराको फुटेज जाँच गर्छ । अनि सिसिटिभी क्यामराको फुटेजले खोल्छ वेवारिसे देखाउन खोजिएको शवभित्रको अपराध ।
ईलाका प्रहरी कार्यालय सिमराले घटनाको थप अनुसन्धान गर्न तत्कालै प्रहरी निरीक्षक प्रकाश थापाको नेतृत्वमा पाँच सदस्यीय टोली गठन गर्छ । सिसिटिभी फुटेजको दृश्यबाट अनुसन्धान सुरु गरेको थापा नेतृत्वको प्रहरी टोलीले ४८ घण्टाभित्रै अपराधमा संलग्न एउटा कारसहित तीन जनालाई पक्राउ गर्छ ।
बा ३ च १४४३ नम्बरको निलो रङको कारमा आएका केही व्यक्तिले शव सडकमा छोडेर फरार भएको भिडियोमा देखिन्छ । उक्त कार सिमरा हुँदै मकवानपुरको रातोमाटेबाट हेटौंडातर्फ लागेको सिसिटिभी फुटेजमा देखेपछि प्रहरी सहायक निरीक्षक बृजेश यादव नेतृत्वको प्रहरी टोली पछ्याउँदै अघि बढ्छ । प्रहरीले घटनाको भोलिपल्ट बैशाख ८ गते मंगलबार साँझ काभ्रेको बनेपा नगरपालिका–८ धुलबजारस्थित मुगले अटो वर्कशपबाट कारसहित चालक मुन्ना भनिने समिउल्लाह आलमलाई पक्राउ गर्न सफल हुन्छ ।
भारत बिहार घर भई पाँचखाल नगरपालिका–४ तामाघरमा बस्दै आएका आलम पक्राउ परेपछि घटनाको थप तथ्य खुल्छ । आलमका अनुसार उक्त कार भाडामा प्रयोग भएको थियो । माझीलाई लिएर काभ्रेबाट बारासम्म आएको उक्त कारमा पर्सा सखुवा प्रसौनी गाउँपालिका–६ लखनपुरका २० वर्षीय बिशाल साह र बारा फेटा गाउँपालिका–३ गाछीटोलका २५ वर्षीय कौशल देवान सवार रहेका हुन्छन् ।
प्रहरीले साहलाई सिमरा र देवानलाई नितनपुरबाट पक्राउ गर्छ । साह, देवान र माझी घर बनाउने मिस्त्री भएको खुल्छ । उनीहरु पछिल्लो समय काभ्रेको पाँचखाल नगरपालिका–५ मा बसेर घर बनाउने काम गर्दै आएका थिए । वीरगञ्ज महानगरपालिका–१ छपकैया घर भएका ठेकेदार मेहराज अन्सारीले उनीहरुलाई काममा लगाएका हुन् ।
साह र देवानले प्रहरीलाई दिएको प्रारम्भिक बयानका अनुसार माझी केही दिनदेखि बिरामी थिए । उनको अवस्था दिन प्रतिदिन बिग्रँदै गएको थियो । अवस्था चिन्ताजनक बन्दै गएपछि ठेकेदार अन्सारीले साह र देवानलाई प्रयोग गरेर माझीलाई घर नजिकैको सडकमा ल्याएर छोडिदिने जुक्ति निकाल्छन् र कार भाडामा लिएर माझीलाई पाँचखालबाट बारा पठाउँछन् ।
साह र देवानले पाँचखालबाट बारा ल्याउने क्रममा माझीको निधन भएको बयान प्रहरीलाई दिएका छन् । आफूहरुले ठेकेदारले भने अनुसार ल्याई दिने काम मात्रै गरेको भनाई उनीहरुको छ । तर प्रहरीले भने मृतकको शव व्यवस्थापनमा उनीहरु मुख्य भूमिकामा देखिएकाले ज्यानसम्बन्धी कसुरमा अनुसन्धान सुरु गरेको बताएको छ ।
‘बाटोमा ल्याउँदै गर्दा मृत्यु भएपछि सडकमै छोडेर हिँडेको भनेर भनिएको छ’, अनुसन्धान अधिकृत प्रहरी निरीक्षक थापाले भने, ‘घटना रहस्यमय छ । हामीले अनुसन्धान सुरु गरिसकेका छौं । थप तथ्य खुल्दै जानेछ ।’ चैत २३ गते काम गर्न भन्दै घरबाट पाँचखाल गएका माझीको मृत्यु शंकास्पद देखिएको प्रहरी निरीक्षक थापाको भनाई छ ।
बिरामी भएकै समयमा परिवारसँग सम्पर्क नगराउनु र शव सडकमै छोडेर हिड्ने विषय सामान्य नरहेको बताउँदै थापाले प्रहरीले गम्भीर रुपमा अनुसन्धान गरिरहेको बताए । घटनापछि पीडित परिवारले कार चालक, ठेकेदार र दुई मिस्त्रीसहित चार जनाविरुद्ध किटानी जाहेरी दिएका छन् । प्रहरीले उनीहरुविरुद्ध ज्यानसम्बन्धी कसुरमा अदालतबाट म्याद थप गरी अनुसन्धान सुरु गरेको छ । मृतक माझीको श्रीमती, एक छोरा र एक छोरी छन् ।
प्रतिक्रिया दिनुहोस !
