सुनसरी : भारतको बिहार राज्यबाट भन्सार छली गरी नेपाल भित्र्याइँदै गरेका करिब ९ लाख रुपैयाँभन्दा बढी मूल्यका अवैध सामान सशस्त्र प्रहरीले बरामद गरेको छ । शुक्रबार बिहान करिब ४ः१० बजे सुनसरीको देवानगञ्ज गाउँपालिका–१ स्थित मध्यहर्षाही क्षेत्रमा सीमा सुरक्षा गुल्म कप्तानगञ्जबाट खटिएको सशस्त्र प्रहरी टोलीले मोबाइल गस्तीका क्रममा उक्त सामान बरामद गरेको हो ।
सशस्त्र प्रहरी नायव निरीक्षक रमेशकुमार बोहोराको कमाण्डमा खटिएको १० सदस्यीय टोलीले भारतबाट नेपालतर्फ ल्याइँदै गरेको अवस्थामा दुई वटा मोटरसाइकलमा लोड गरिएका सामान नियन्त्रणमा लिएको सशस्त्र प्रहरी बल, नम्बर ४ गण सुनसरीका प्रमुख सशस्त्र प्रहरी उपरीक्षक श्यामकुमार कार्कीले जानकारी दिए ।
बरामद सामानमा डबल बेडका तन्ना सेट १२० थान, वाइफाइ राउटर तथा चार्जर १०० थान, नक्कली गहना ३०० पिस र ४ बोरा सुर्ती रहेका छन् । ती सामानको अनुमानित मूल्य करिब ७ लाख ३० हजार रुपैयाँ रहेको छ । तस्करीमा प्रयोग गरिएका दुईवटा मोटरसाइकलको मूल्य करिब २ लाख रुपैयाँ आँकलन गरिएको छ ।
यससँगै बरामद सामान र सवारीसाधनको कुल मूल्य करिब ९ लाख ३० हजार रुपैयाँ पुगेको सशस्त्र प्रहरी उपरीक्षक कार्कीले बताए । प्रहरी टोलीलाई देखेपछि सामान बोकेका व्यक्तिहरू मोटरसाइकल र सामान छाडेर फरार भएका छन् । बरामद गरिएका सबै सामान र मोटरसाइकल सीमा सुरक्षा गुल्म कप्तानगञ्जमा राखिएको र फरार व्यक्तिहरूको खोजी कार्य जारी रहेको सशस्त्र प्रहरीले जनाएको छ ।
प्रतिक्रिया दिनुहोस !
