इजरायल : इजरायली सेना सन् २००६ यता पहिलो पटक दक्षिणी लेबनानको लिटानी नदी पार गर्दै अगाडि बढेको छ । अहिले दक्षिणी लेबनानको प्रमुख शहर नाबातियेहलाई चारैतिरबाट घेर्ने तयारीमा रहेको जनाइएको छ । शनिबार लेबनानी सेनाका उच्च स्रोतहरूले टर्कीको सरकारी समाचार संस्था अनादोलु एजेन्सीलाई दिएको जानकारीअनुसार इजरायली फौजले लिटानी नदी पार गरेको छ ।
इजरायलले यस क्षेत्रलाई आफ्नो अनौपचारिक सुरक्षा बफर जोनको सीमारेखा मानेको छ । हाल इजरायली सेना नाबातियेह शहरको बाहिरी क्षेत्रमा पुगेको बताइएको छ । दक्षिणी लेबनानको अर्थतन्त्र र सांस्कृतिक गतिविधिका लागि महत्वपूर्ण मानिने यो शिया बहुल शहर इजरायली नियन्त्रणमा पुगेमा लेबनानविरुद्धको युद्ध र त्यसपछिको युद्धविराम प्रक्रियामा ठूलो मोड आउने विश्लेषण गरिएको छ ।
नाबातियेहलाई धेरै लेबनानीहरूले इजरायली आक्रमणविरुद्धको प्रतिरोधको प्रतीकका रूपमा हेर्ने गर्छन् । यसको ऐतिहासिक भूमिका लामो समयदेखि इजरायल–लेबनान द्वन्द्वको अग्रपंक्तिमा रहेको छ । इजरायलले दक्षिणी लेबनानमा आफ्नो हवाई अभियान विस्तार गरिरहेको र नाबातियेहलाई घेराबन्दी गरेर सम्भावित स्थलगत आक्रमणको तयारी गरिरहेको बताएको छ । उनका अनुसार इजरायलले हिज्बुल्लाहका दोस्रो र तेस्रो रक्षा रेखा भत्काउँदै नाबातियेहलाई अलग पार्ने तथा पश्चिमी बेका उपत्यकालाई देशको दक्षिणी भागबाट काट्ने प्रयास गरिरहेको देखिन्छ ।
यसैबीच लेबनानी सेनाले जारी गरेको वक्तव्यमा नाबातियेह नजिकै इजरायली ड्रोनले एउटा सवारीसाधनलाई निशाना बनाउँदा दुई सैनिक गम्भीर घाइते भएको जनाएको छ । शनिबार राति लेबनानको राष्ट्रिय समाचार एजेन्सी एनएनए) ले दक्षिणी गाउँ जेबचितमा भएको इजरायली ड्रोन आक्रमणमा कम्तीमा एक जना स्वास्थ्यकर्मीको मृत्यु भएको र अन्य चार जना घाइते भएको जनाएको छ । उक्त आक्रमणबाट लेबनानी राहत अस्पतालमा समेत क्षति पुगेको भए पनि अस्पतालका चिकित्सक, नर्स र एम्बुलेन्सकर्मी सुरक्षित रहेको बताइएको छ ।
त्यसैगरी इजरायली हवाई आक्रमण र तोप प्रहार दक्षिणी लेबनानको ठूलो भूभागमाथि नजर राख्ने ऐतिहासिक बोफोर्ट किल्ला आसपास पनि भएको जनाइएको छ । १२औं शताब्दीमा निर्माण भएको यो किल्ला सन् २००० सम्म १८ वर्ष इजरायली सेनाको नियन्त्रणमा थियो । प्रतिक्रियास्वरूप हिज्बुल्लाहले उत्तरी इजरायलको किर्यात शमोना शहरतर्फ रकेट प्रहार गरेको जनाएको छ । साथै दक्षिणी लेबनानको घान्दुरियेह क्षेत्रमा इजरायली सैनिकमाथि एम्बुस आक्रमण गरी उनीहरूलाई पछि हट्न बाध्य पारेको दाबी गरेको छ ।
हिज्बुल्लाहले पछि जारी गरेका छुट्टाछुट्टै वक्तव्यमा याहमोर अल–शाकिफ ( नजिक इजरायली सैन्य सवारीसाधनलाई अबाबिल ड्रोनमार्फत ध्वस्त पारेको, उत्तरी इजरायलको यारा सैनिक ब्यारेकमाथि ड्रोन आक्रमण गरेको तथा नाकौरा र नहारिया क्षेत्रमा पनि विभिन्न सैन्य लक्ष्यमा आक्रमण गरेको जनाएको छ ।
यता इजरायलले दक्षिणी लेबनानका कम्तीमा १० वटा गाउँका बासिन्दालाई तत्काल क्षेत्र खाली गर्न आदेश दिएको छ । इजरायली सेनाका अरबी भाषाका प्रवक्ता अभिचाय अद्राईले त्यहाँ बसिरहे ज्यान जोखिममा पर्न सक्ने चेतावनी दिएका छन् । जारी युद्धका कारण लेबनानको करिब २० प्रतिशत जनसंख्या अर्थात् झण्डै १२ लाख मानिस विस्थापित भइसकेका छन् । धेरै परिवार आफन्तको घर, अस्थायी शिविर वा आफ्नै सवारीसाधनमा बस्न बाध्य भएका छन् ।
प्रतिक्रिया दिनुहोस !
