करको विषयमा अर्थमन्त्रीले संसदीय समितिमा गएर झुट बोल्नु भएको छ : ज्ञानेन्द्र शाही

काठमाडौं : राष्ट्रिय प्रजातन्त्र पार्टी (राप्रपा) का सांसद ज्ञानेन्द्र शाहीले करको दर हेरफेरको विषयमा अर्थमन्त्री स्वर्णिम वाग्लेले संसदीय समितिमा गएर झुट बोलेको टिप्पणी गरेका छन् ।

प्रतिनिधिसभाको आजको बैठकमा बोल्दै सांसद शाहीले करको विषयमा आफूहरुले संसदीय छानविन समितिको माग गरेको रहरका लागि नभएको बताएका छन् । सांसद शाहीले सरकार र अर्थमन्त्रीलाई काम गर्न दिनु हुँदैन भन्ने मान्यतामा आफूहरु नरहेको समेत बताएका छन् ।

आफूसँग महालेखा परीक्षकको रिपोर्ट रहेको र पेज नम्बर नै भन्नु परे पनि भनिदिने बताउँदै सांसद शाहीले महालेखा परीक्षकको रिपोर्टको १५२ नम्बर पेजमा इभी गाडीहरुमा त्यसका क्षमतालाई तलमाथि गरेर मात्रै तातोपानी, कोरला र रसुवागढीबाट मात्रै दुई अर्ब ५० करोड ८३ लाख १६ हजार अघिल्लो सरकारले छुट दिएको र त्यसको छानविन गर भनेको बताए ।

देशैभर गरेर तीन अर्ब ७७ करोड ४४ लाख १९ हजार छुट महसुल र करका सम्बन्धमा छानविन गरी असुल उपर गर्नुपर्छ भनेको जानकारी गराए । उनले जेठ १ गतेदेखि १४ गतेसम्म ३ हजार सवारीसाधन नेपाल भित्रिएको देखिने बताए । उनले गाडी २१ गते आएको तर भन्सार पास भने १४ गते नै भएको स्पष्ट देखिएको बताएका छन् । उनले भने, ‘करको दर थाहा नभई त्यो गाडीहरु कसरी आयो ?’