स्वर्गको सपना, पृथ्वीमै ऐयासी : पाकिस्तानी आतंकवादीहरूको खल्तीमा भेटिए यस्ता ‘लभ लेटर’

पाकिस्तान : कश्मीरमा दशकौंदेखि पाकिस्तानले जसलाई ‘धर्मयुद्ध’ वा ‘जिहाद’ भन्दै आएको छ, त्यसको वास्तविक र भित्रि सत्य अब प्रमाणसहित संसारसामु आउन थालेको छ । उपत्यकामा धर्मको नाममा रक्तपात गर्न आएका विदेशी तथा पाकिस्तानी आतंकवादीहरूको उद्देश्य कहिल्यै पनि कुनै ‘पवित्र’ लडाइँ थिएन । 

मुठभेडमा मारिएका ती आतंकवादीहरूको खल्ती खानतलासी गर्दा सुरक्षा बलहरूले ‘शहादत’ का सन्देश होइन, बरु कश्मीरी युवतीहरूलाई लेखिएका ‘लभ लेटर’ र कन्डोम जस्ता वस्तुहरू फेला पारे । यसले त्यस्तो खतरनाक सम्बन्धलाई उजागर गर्छ, जसले कश्मीरका निर्दोष मानिसहरूलाई धोका दिएर आतंकको नाममा केवल ऐयाशीको खेल खेलेको थियो ।

यो सनसनीपूर्ण वास्तविकता एक पूर्व कश्मीरी आतंकवादी र पछि भारतीय सेनाका लागि अन्डरकभर एजेन्टको रूपमा काम गरेका मुश्ताक अहमद भटले सार्वजनिक गरेका हुन् । उनको कोडनेम अशफाक÷रोमियो थियो । हालै युट्युबर प्रखर गुप्ताको लोकप्रिय पोडकास्टमा भएको अन्तर्वार्तामा उनले यो कालो सत्य उजागर गरेका हुन् । उनले ९० को दशकदेखि २०१६ सम्मको आतंकवादको अँध्यारो इतिहास खोल्दै पाकिस्तानले लुकाउन खोजेको वास्तविकता बाहिर ल्याए । उनका अनुसार सीमा पारबाट आउने आतंकवादीहरू ‘मुजाहिद’ को भेषमा आएर केवल स्थानीय युवतीहरूलाई फसाउने र शोषण गर्ने काम गर्थे ।

‘लभ लेटर’ र विदेशी आतंकवादीहरूको धोका
पोडकास्टमा मुश्ताकले ती ‘लभ लेटर’ का पुराना बन्डलहरू देखाए, जुन मरेका पाकिस्तानी आतंकवादीहरूको खल्तीबाट फेला परेका थिए । अंग्रेजी, हिन्दी र उर्दूमा लेखिएका ती पत्रहरूमा जिहादको कुनै कुरा थिएन, बरु कश्मीरी युवतीहरूलाई फसाउन लेखिएका प्रेमपूर्ण कुरा र झूटा कसमहरू थिए । ती पत्रहरूमा लेखिएको थियो, ‘पापीसँग होइन, पापसँग घृणा गर’, ‘म तिम्रो राम्रो चरित्रलाई माया गर्छु’ आदि । मुश्ताकका अनुसार विदेशी आतंकवादीहरूले यस्ता झूटा प्रेमपत्रहरू प्रयोग गरेर स्थानीय युवतीहरूलाई जालमा पार्थे ।

‘जिहाद’ को नाममा ऐयासीका प्रमाण
कथा केवल लभ लेटरमा मात्र सीमित छैन । पूर्व कमाण्डरका अनुसार धेरै मुठभेडमा मारिएका पाकिस्तानी आतंकवादीहरूको तलासी गर्दा उनीहरूबाट कन्डोम पनि फेला परेको थियो । जब सुरक्षाकर्मीहरूले उनीहरूलाई सोध्थे कि यदि उनीहरू धर्मयुद्ध गर्न आएका हुन् भने यी वस्तु किन बोकेका छन्, उनीहरू आक्रोशित हुँदै ‘काफिर–काफिर’ चिच्याउँथे । यसले स्पष्ट देखाउँछ कि उनीहरू धार्मिक युद्ध होइन, बरु व्यक्तिगत स्वार्थ र ऐयासीका लागि आएका थिए ।

अवैध सम्बन्ध र कश्मीरी जीवनमा असर
अन्तर्वार्तामा अर्को चकित पार्ने तथ्य पनि सार्वजनिक भयो । शोपियाँ र दक्षिण कश्मीरका धेरै गाउँमा आज पनि त्यस्ता बालबालिका छन्, जो पाकिस्तानी आतंकवादीहरूको अवैध सन्तान हुन् । ती आतंकवादीहरूले स्थानीय घरहरूमा आश्रय लिएर झूटा विवाह वा सम्बन्ध बनाएर बसेका थिए । पछि उनीहरू मुठभेडमा मारिए, तर उनीहरूले छोडेका महिला र बालबालिकाहरू आज पनि सामाजिक कलंकका साथ जीवन बिताइरहेका छन् ।

‘मुजाहिद’ होइन, केवल स्वार्थी व्यक्तिहरू
दशकौंदेखि ‘शहीद’ र ‘मुजाहिद’ को नाममा कश्मीरमा हिंसा फैलाउनेहरूको वास्तविकता अब बाहिर आउँदैछ । यो तथ्यले देखाउँछ कि कश्मीरमा पाकिस्तान प्रायोजित आतंकवाद कहिल्यै पनि धार्मिक वा वैचारिक लडाइँ थिएन । यो केवल यस्तो गतिविधि थियो, जसमा युवाहरूलाई प्रयोग गरेर केही समूहहरूले आफ्नो स्वार्थ पूरा गरे । यो सत्य कश्मीरका ती युवाहरूका लागि चेतावनी हो, जो अझै पनि यस्ता प्रचारको शिकार भइरहेका छन् ।