वीरगन्जका अस्पतालमा आकस्मिक उपचार सेवा पनि ठप्प, बिरामीहरुको बिजोग

वीरगन्ज : चिकित्सक कुटिएको विरोधमा वीरगन्जका चिकित्सकहरु हड्तालमा उत्रिएका कारण यहाँका सरकारी र निजी अस्पतालमा तीन दिनदेखि आकस्मिकसहितका सबै उपचार सेवा प्राय ठप्प छ । 

मंगलबारदेखि नेपाल चिकित्सक संघको आह्वनमा देशभरका अस्पतालमा आकस्मिक बाहेकका सेवा ठप्प भएपनि वीरगन्जका अस्पतालहरुमा भने चिकित्सकहरुले गत आइतबारदेखि नै आकस्मिकसहित सबै सेवा बन्द गर्दै हड्तालमा बसेका छन् । जसका कारण यहाँका अस्पतालहरुमा उपचारका लागि पुगेका बिरामीहरु तीन दिनदेखि अलपत्र परेका छन् । यहाँका अस्पतालमा चिकित्सकले आकस्मिक उपचार सेवा समेत बन्द गरेपछि बिरामीहरुको बिजोग भएको छ ।  

मंगलबार बिहान नारायणी अस्पतालमा उपचारका लागि पुग्दा डाक्टरहरुको हड्ताल लेखिएको ब्यानर झुण्ड्याइएको देखेपछि वीरगन्ज–२२ मनियारीका बृद्ध वकिल राउतले भने ,पाखुरा दुखेर हैरान छु, इलाज गर्न आएको त डाक्टर साबहरु नै हड्तालमा छन् भन्ने सुने । प्राइभेट अस्पतालमा पनि हड्ताल छ भन्छन् । अब के गर्नु ? घर फर्किन्छु ।

नारायणी अस्पतालकै बहिरंग विभाग (ओपीडी) अगाडि भेटिएका बाराको रजवटीयाका शम्भु कुम्हालको पनि पीडा उस्तै थियो । उनले भने, ‘बृद्धा आमालाई लिएर आएको थिए । तर यहाँ त डाक्टरहरु सबै हड्तालमा पो रहेछन् । प्राइभेट हस्प्टिलमा पनि डाक्टर छैनन् । अब म के गरु ? यी बुढी आमालाई लिएर म कहाँ जाउँ ? अलपत्र परेका छौं ।’ चिकित्सकमाथि हातपात गरिनु निन्दनीय भए पनि आफ्नो न्यायका लागि चिकित्सकहरुले उपचार नै ठप्प पारेर आन्दोलनमा उत्रिनु जायज नभएको उनले सुनाए । 

नारायणी अस्पतालमै डाक्टरलाई कुरेर बसेको अवस्थामा भेटिएकी पर्साको बलुवा गाउँकी बृद्धा नयन कुमारी देवीले भनिन्, ‘घरबाटै बिहान टेम्पु चढेर हस्पिटलमा आए । तर यहाँ आउँदा कोही डाक्टर भेटिएनन् । हड्तालमा छन् भन्ने सुने । ढाड र कम्मर दुखेर सहि नसक्नु छ । डाक्टरहरुको हड्ताल कहिले खुल्छ ठेगान पनि छैन । अब इलाज कहाँ गएर गराउँ मैले ? अब दवाई दुकानमा गएर दर्दको दवा (दबाइ) किन्छु त्यहि खान्छु । हस्प्टिल खुलेपछि फेरि आउँछु ।’ 

पत्नीलाई सुत्केरी बेथा लागेपछि लिएर मंगलबार बिहान नारायणी अस्पतालमा पुगेका पर्साको हरपुरका गुल्टन यादव अस्पतालमा डाक्टरहरुको हड्ताल छ भन्ने थाहा पाएपछि एकछिन त अक्कबक्कमा परे । उनले भने, ‘वीरगन्जका सबै हस्पिटलमा डाक्टरको हड्ताल रहेछ भन्ने खबर यहाँ आएपछि मात्रै थाहा पाए । अब श्रीमतिलाई लिएर भारत रक्सौलको डंकन हस्पिटलमा जाँदैछु ।’

नारायणी अस्पतालले पहिले भर्ना भई उपचाररत बिरामीहरुलाई मंगलबार दिउँसोदेखि डिस्चार्ज गरेर घर पठाउन थालेको छ । नारायणी अस्पतालका स्वास्थ्यकर्मी अजय यादवले भने, ‘डाक्टर नै आउँदैनन् । हामीले आफ्नो रिक्समा बिरामीलाई कहिलेसम्म वार्डमा राख्ने ? कहि तलमाथि भयो भने हामीले पनि कुटाइ खानुपर्छ । त्यसैले वार्डका बिरामीलाई डिस्चार्ज गरेर घर पठाइरहेका छौं ।’

गत शनिबार नारायणी अस्पतालको आकस्मिक कक्षमा तोडफोड गर्ने र त्यहाँ कार्यरत चिकित्सक डा. प्रमोद राममाथि सांघातिक आक्रमण गर्नेहरुलाई प्रहरीले पक्राउ गरेपछिमात्रै आकस्मिक उपचार सेवा सञ्चालनमा ल्याउन सकिने चिकित्सकहरुको अडान रहेको अस्पतालका निमित्त प्रमुख मेडिकल सुपरीटेन्डेन्ट डा. चित्तरन्जन साहले बताए । 

उनले भने, ‘पहिले डाक्टरलाई मरणासन्न हुुनेगरी कुट्नेहरुलाई प्रहरीले पक्राउ गरोस्, अनिमात्रै इमरजेन्सी सेवा खोल्छौ भन्ने डाक्टरहरुको अडान छ। त्यसपछि मात्रै अन्य मागहरुका बारेमा सरकारसगँ वार्तामा बस्ने डाक्टर साबहरुले भनिरहनु भएको छ ।’ नारायणी अस्पतालको जस्तै वीरगन्जका निजी अस्पतालहरुमा पनि सोमबारै देखि आकस्मिकसहितका उपचार सेवा प्रभावित छ । आकस्मिक विभागमा समेत चिकित्सक नहुदाँ अस्पतालले नयाँ बिरामी भर्ना लिन मानेका छैनन् । अस्पतालका विभिन्न वाडमा पहिलेदेखि भर्ना भएका बिरामीहरुको उपचारपनि चिकित्सक नआएका कारण स्टाफ नर्स, हेल्थ असिस्टेन्ट र अनमीको भरमा भइरहेको छ ।

यता वीरगन्ज हेल्थ केयर हस्पिटलकी प्रशासन प्रमुख भूमिका अधिकारीले पनि सोमबारदेखि आकस्मिक र ओपीडी सेवा बन्द रहेको बताइन् । पहिलेदेखि भर्ना भएका बरिामीहरुको मात्रै उपचार गरिरहेको उनले बताइन् । उनले भनिन्, ‘इमरजेन्सी विभागमा पनि डाक्टरहरु हुनुहुन्न । ओपीडी पनि बन्द छ । त्यसका कारण हामीले नयाँ बिरामी भर्ना गरेका छैनौं । तर पहिलेदेखि वार्डमा भर्ना भएका बिरामीहरुको उपचारमा कुनै कमी हुन दिएका छैनौं ।’ तर यस्तो पाराले कतिदिन सम्म अस्पताल चल्ने चिन्ता अधिकारीको छ । राज्यले आन्दोलनरत चिकित्सकहरुको माग सम्बोधन तत्कालै गरेर बिरामीको उपचारमा संवेदनशील बन्नु पर्ने उनले बताइन् । 

नारायणी अस्पतालका सबै चिकित्सकले दिए सामुहिक राजिनामा
गत शनिबारदेखि उपचार सेवा ठप्प पारे हड्तालमा उत्रिएका वीरगन्जको नारायणी अस्पतालका सबै चिकित्सकले मंगलबार सामुहिक राजीनामा दिएपछि समस्या थप बल्झिएको छ । अस्पतालका प्रवक्ता डा. उदय नारायण सिंह अनुसार, अस्पतालका ७१ जना चिकित्सकले मंगलबार निमित्त प्रमुख मेसु साहलाई सामुहिक रुपमा राजिनामा पत्र बुझाएका हुन् ।

सोमबार साँझ जिल्ला प्रशासन कार्यालय पर्सामा बोलाइएको भएको वार्तामै पर्साका प्रमुख जिल्ला अधिकारी भोला दाहाल र नेपाल प्रहरीका प्रहरी उपरीक्षक सुदीपराज पाठकले आन्दोलनरत चिकित्सकहरुसंग दुव्र्यवहार गरेपछि थप आक्रोशित बनेका चिकित्सकहरुले सामुहिक राजिनामा दिएको निमित्त प्रमुख मेसु साहले बताए । 

गत शनिबार नारायणी अस्पतालको आकस्मिक कक्षमा उपचारत वीरगन्ज–२५ का ४५ वर्षीय राजकुमार पटेलको उपचारकै क्रममा मृत्यु भएपछि आक्रोशित परिवारजन र गाउँलेले अस्पतालको आकस्मिक कक्षमा भएको तोडफोड गर्नुका साथै त्यहाँ कार्यरत तथा डा. प्रमोद राममाथि भएको निर्घात कुटपिट गरेका थिए । कुटपिटबाट गम्भीर घाइते डा. रामको वीरगन्जमा तीन दिनसम्म उपचार गरिदाँपनि अवस्थामा सुधार नआएपछि थप उपचारका लागि सोमबार राति काठमाडौंको टमा सेन्टरमा पठाइएको छ । 

त्यहि घटनाको विरोधमा नारायणी अस्पतालसहित वीरगन्जका सबै अस्पतालका चिकित्सकहरु गत आइतबारदेखि नै आकस्मिकसहित सबै उपचार सेवा ठप्प पार्दै  हड्तालमा छन् । सोमबार साँझ जिल्ला प्रशासन कार्यालयमा भएको वार्तामा आन्दोलनरत चिकित्सकहरुले पर्साका प्रमुख जिल्ला अधिकारी र प्रहरी प्रमुख (एसपी) ले पनि राजिनामा दिपर्ने अडान राखेका थिए । चिकित्सकहरुको उक्त अडान सुनेपछि प्रजिअ दाहालले आक्रोश पोखेपछि वार्तामा सहभागी चिकित्सकहरु वार्ता छाडेर निस्किन थाल्दा प्रहरी उपरीक्षक पाठकले उनिहरुलाई धक्कामुक्की गर्दै प्रजिअको कार्यकक्षभित्र लगेका थिए । त्यसक्रममा चिकित्सक र प्रहरीबीच फेरि धकेलाधकेल पनि भएको थियो । त्यसपछि चिकित्सकहरु वार्ता छाडेर जिल्ला प्रशासन कार्यालयबाट बाहिरिएका थिए । 

यता शनिबार नारायणी अस्पतालको आकस्मिक कक्षमा उपचारका क्रममा मृत्यु भएका वीरगन्ज–२५ का पटेलका आफन्त र गाउँलेले उपचारमा लापरवाही गरिएको आरोप लगाउँदै आएका छन् । उनीहरुले उपचारमा लापरवाही गर्ने अस्पताल प्रशासन र चिकित्सकलाई कारबाहीको माग गर्दै आएका छन् । मंगलबार पनि वडाध्यक्ष आशुतोष चर्तुवेदसहित मृतकका आफन्त र गाउँलले वीरगन्जको सुख्खा बन्दरगाह चोकको सडकमै धर्ना दिएर प्रदर्शन पनि गरेका छन् ।