शौचालय निर्माणका लागि आवश्यक सामग्री सहयोग माग्न गाविस कार्यालय पुगेका ५० वर्षीय चैता सरदारलाई कर्मचारीले मदिरा पिएर आएको भन्दै दुर्व्यवहार गरेपछि झुन्डिएर आत्माहत्या गरेको स्थानीय बासीको आरोप छ ।
भौँडाहा ८ घर भएका सरदार मंगलबार दिउँसो शौचालय निर्माणका लागि आवश्यक सामाग्री सहयोग माग्न भौँडाहा ५ स्थित गाविस कार्यालय पुगेका थिए । दिउँसो तीन बजे कार्यालय पुगेका सरदारलाई कर्मचारीले दुर्व्यवहार गरेर लखेटेका थिए ।
उनै सरदारको शव साँझ गाविस कार्यालयमा आफ्नै गाम्छाको पासो लाएर झुन्डिएको अवस्थामा फेला परेको हो । गाविस भवनको बैठक कक्षको झ्यालमा झुन्डिएको अवस्थामा देखेपछि कर्मचारीले प्रहरीलाई खबर गरेका थिए ।
‘शौचालय निर्माणका लागि भन्दै रिङ माग्न आएपछि भेनमा हालेर लैजानु भनेर कर्मचारी आफ्ना काममा व्यस्त भएँ,’ गाविस सचिव ईश्वरी पोखरेलले भने, ‘गाविस बन्द गर्नका लागि पुगेका कार्यालय सहयोगीले सरदारलाई साँझ ५:३० बजे तिर मृत अवस्थामा भेटेपछि घटनाका बारेमा सबैलाई खबर भयो ।’
सचिव पोखरेलले सरदारमाथि कुनै दुव्र्यवहार भने नगरिएको बताएका छन् । ‘मदिरा सेवन गरेर आएका उनले कर्मचारीसँग निहुँ खोज्ने कुरा गर्दै थिए,’ उनले भने, ‘वास्ता नगरिकन सबै आआफ्ना काममा व्यस्त भए तर पछि झुन्डिएको अवस्थामा शव भेटियो ।’
कर्मचारीको दुव्र्यवहारले सरदारले आत्महत्या गरेको भन्दै स्थानीय बासीले गाविस भवन तोडफोड र आगजनी गरेका छन् । आगजनी र तोडफोडबाट गाविस भवनका कागजपत्र, अभिलेख, फर्निचर र कम्युटरलगायत सामाग्री जलेर नष्ट भएका छन् । सचिव पोखरेलले स्थानीयको आक्रोशले गाविस भवनमा ठूलो क्षति भएको बताए ।
मोरङ प्रहरी प्रमुख एसपी सन्दीप भण्डारीका अनुसार तीन/चार सय भन्दा बढीको संख्यामा भाला, लाट्ठी लगायतका घरेलु हतियार बोकेर आएका स्थानीय बासिन्दाले गाविस भवनमा एक्कासि ढुँगामुढा गर्दै आगजनी र तोडफोड गरेका थिए ।
प्रहरीले गाविस भवनमा तोडफोड र आगजनी गर्नेको खोजी गरिरहेको छ भने सरदारको आत्महत्याका सम्बन्धमा समेत अनुसन्धान भइरहेको बताएको छ ।
भौंडाहा गाविसलाई खुल्ला दिसा मुक्त घोषणा गर्ने अभियान अन्तर्गत सबैका घरमा शौचालय अनिवार्य गरिएको थियो । शौचालय अनिवार्य गरिपछि सरदार सहयोग माग्न गाविसमा पुगेका थिए ।
स्थानीय बासिन्दाले गाविसका मुखिया विश्व सरदार लगायतसँग यस विषयमा सरदारको केही भनाभन भएपछि गाविसका कर्मचारीले दुव्र्यवहार समेत गरेको बताए।
गाविसलाई खुल्ला दिसा मुक्त घोषणा गर्ने कुरा अन्तिम चरणमा पुगेको भन्दै यस विषयमा छलफल गर्नका लागि गाउँ सरसफाई समितिको बैठक बुधबार बोलाइएको थियो ।
सुनियोजित रुपमा मर्न बाध्य पारिएको भन्दै स्थानीय बासिन्दा आक्रोसित बनेका हुन् । उनीहरुले यस घटनाको निष्पक्ष छानबिन हुनु पर्ने माग समेत गरेका छन्।
प्रतिक्रिया दिनुहोस !
