इटहरीः अफगानिस्तानको काबुलमा आत्मघाती बम विष्फोटमा सुनसरीको इटहरीका अकुर तामाङको मृत्यु भएपछि उनको परिवार शोकमा डुबेको छ ।
पाँच वर्षअघिदेखि अफगानिस्तानमा सुरक्षागार्डका रुपमा कार्यरत तामाङको सोमबार हत्या भएपछि उनकी ६५ वर्षीया आमा लाखमाया, ७७ वर्षीय बुवा भीमबहादुर र परिवारका अन्य सदस्य शोकमा डुबेका छन् ।
छोराको मृत्युको खबरले अकुरकी आमा लाखमाया बेहोस भइन् । शोकमा डुबेकी उनी पैसाको खातिरले छोराको मृत्यु भएको भन्दै भक्कानिरहेकी छिन् । गत बैशाख १७ गते दोधार हुँदै गएको छोरो अकुरसँग हप्तादिन अगाडि मात्र आमा लाखमायाले फोनमा बोलेकी थिइन् ।
‘फोनमा कुरा गर्दा आमा मलाई राम्रै छ चिन्ता नगर्नु है भन्थ्यो’, गहभरी आँसु पार्दै लाखमायाले भनिन्, ‘छोराले मेरो क्रिया गर्छ, होला भनेको त आफैँले उसको क्रिया गर्नुपर्यो ।’
पाँच वर्षअघि नेपाली सेनाको जवानको जागिर छाडेर अफगानिस्तानमा रोजगारी गर्न गएका अकुर वर्षैपिच्छे घर आउँथे ।
हेटौंडाकी गामा गोलेसँग प्रेम विवाह गरेका अकुर नयाँ बर्ष २०७३ परिवारसँग नाचगान गर्दै मनाएर एक वर्षपछि फर्किने वाचा गर्दै अफगानिस्तान गएको अकुरकी जेठी भाउजू कमलाले बताइन् ।
‘एक वर्षपछि घर आउँछु भन्दै विदा हुनुभएका देवरबाबुको डेढ महिनामै मृत्युको खबर सुन्नुपर्यो’, उनले भनिन्, ‘भगवनाले पनि राम्रा मान्छेलाई देखिसहँदा रहेनछन् ।’अकुरकी पत्नी माइतीघर हेडौँडामा रहेकाले इटहरी बोलाइएको छ ।
विदामा घर आएको छोराले अफगानिस्तान जाउँ की नजाउँ भन्दै दोधार गरेपछि आफुले पटक पटक अफगानिस्तान नजान आग्रह गरेपनि नमानेको आमा लाखमायाले सुनाइन् ।
अकुरकी भतिजी कोपिला पनि काकाले ल्याइदिएको मोबाइल देखाउँदै भक्कानिरहेकी छिन् । ‘राम्रो पढ्नु अर्काेचोटी आउँदा ल्यापटप ल्याएदिन्छु भन्नुहुन्थ्यो’, उनले रुँदै भनिन्, ‘मेरो काकालाई कुनचाहिँ अपराधीको नजर लाग्यो ।’
अकुर भीमबहादुरका मन्तरे छोरा थिए । खोटाङको दिक्तेल नगरपालिकाबाट २०६० देखि तामाङ परिवार इटहरीको हाँसपोसामा बस्दै आएका थिए ।
अकुर तीन वर्षअघि हेटौँडाकी गोमा गोलेसँग विवाहबन्धनमा बाधिएका थिए । पति अफगानिस्तानमा रोजगारीका लागि गएपछि गोमा माइतमै बस्दै आएकी थिइन् ।
पतिको मृत्युको खबरपछि उनी मंगलवार इटहरी आउँदैछिन्। अकुरका दाजु देव तामाङले भाइको शव तत्काल नेपाल ल्याइदिन सरकारसँग माग गरेका छन् ।
प्रतिक्रिया दिनुहोस !
