आकाशे पुल यौन किनबेच गर्ने थलो
काठमाडौं: उपत्यकाका विभिन्न आकाशे पुलहरू यौन किनबेच गर्ने स्थलका रूपमा परिणत हुँदै गएको छ । अधिकारका लागि अभियान नामक सञ्जालले तीन महिनासम्म गरेको स्थलगत अध्ययनले कंलकी, गोंगबुलगायतका स्थानका आकाशे पुलमा बालिकादेखि युवतीसम्मलाई यौनकार्यका लागि सेटिङ मिलाउने काम हुँदै आएको तथ्य पत्ता लगाएको हो ।
भूकम्पपीडित गाउँबाट आएका, आर्थिक अवस्था कमजोर भएका र साथीसंगीको लहैलहैमा भागेर सहर प्रवेश गरेका बालिकाहरूलाई यौनकार्यमा संलग्न हुने गरेको सञ्जालले जनाएको छ ।
११ वर्षदेखि १८ वर्षका किशोरी, सडक बालिका र लागूपदार्थका दव्र्यसनीहरू यौनकार्यमा लागेको पाइएको छ । अत्यन्त न्यून आर्थिक अवस्था भएका, गर्भवती र एकल महिलासमेत यौनकार्यमा संलग्न रहेका अध्ययनमा संलग्न एमएमएसडी नेपालकी अध्यक्ष रूपा शर्मा (नेहा) ले बताइन् ।
ग्राहकले यौनकर्मीसँग मोलमोलाइ गरिरहेको देख्न, सुन्न र अनुभव गर्न सकिने अध्ययनमा संलग्न छोरी नामक संस्थाकी अध्यक्ष हीरा दाहालले बताइन् । आकाशे पुलमुनि आउने ग्राहकमा प्रहरी, सेना, सवारी मजदुर र विद्यार्थी बढी छन् ।
उनीहरूले प्रतिघन्टा पाँच सय देखि १० हजारसम्म तिर्ने गरेको अध्ययन प्रतिवेदनमा उल्लेख छ । ग्राहकहरूमा आर्थिक स्थिति नाजुक भएकादेखि उच्च ओहदाका व्यक्तिहरूसमेत रहेका स्थलगत अध्ययनमा आबद्ध सञ्जालका सदस्यले बताएका छन् ।
नौ महिनाकी एक गर्भवतीलाई किन यौनकार्यमा संलग्न रहेको भन्ने जिज्ञासा राख्दा सुत्केरी खर्च जुटाउन आएको जबाफ दिएको शर्माले बताइन् । त्यसैगरी मनोरञ्जन क्षेत्र (होटल, रेस्टुरेन्ट, डान्सबार) महिला पनि यौनकार्यमा संलग्न रहेको अध्ययनले देखाएको छ ।
यौनकार्यका लागि व्यक्ति वा स्थान छनोट गर्दा इशाराबाट कुराकानी हुने, नजिकैको गेस्ट हाउसमा जाने र सामान्यतया एक घन्टाका लागि एक हजारका दरले मोलमोलाई हुने गरेको पनि अध्ययनले पत्ता लगाएको छ ।
अवैध यौनकार्य नियन्त्रण गर्न सरकारी निकाय चनाखो हुन थालेपछि क्याबिन रेस्टुरेन्टहरू खाजा घरको रूपमा र मसाजहरू स्पाका रूपमा परिणत हुँदै गए तापनि ती स्थानहरूमा यौनधन्दा यथावत् रहेको शर्माले बताइन् ।
सञ्जालले हालै विभिन्न स्थानहरुमा गरेको मनिटरिङ भिजिटमा भूकम्पपछिको अवस्थामा मनोरञ्जन क्षेत्रमा किशोरीको संख्या बढ्दै गएको र यसमा पनि गोरखाबाट आउने महिला तथा किशोरीको संख्या बढेको तथ्य बाहिर ल्याएको छ ।
यस्ता कार्यमा संलग्न रेस्टुराँहरूले पाँच हजारसम्मको अर्डर लिने ग्राहकलाई एक रातका लागि त्यहाँ काम गर्ने महिला कामदार पठाउने गरेको पनि पत्ता लागेको छ ।
केन्द्रीय बालकल्याण समितिको सहकार्यमा गरिएको अध्ययनपछि यौन धन्दामा लगाइएका पाँचजना बालिकाको उद्धार गरिएको छ । यस्ता गतिविधि नियन्त्रण गर्न र त्यसमा संलल्न बालिकाहरूलाई छिटो उद्धार गर्न आफूहरू क्रियाशील रहेको केन्द्रीय बालकल्याण समितिका बाल संरक्षण अधिकृत रवि गौतमले बताए ।