पूर्वसांसदको हत्या गर्ने श्रीमती र छोरीलाई जन्मकैद

राजविराज: विघटित संविधानसभा सदस्य ५५ वर्षीय सदरुल मियाँ हकको हत्यामा उनकै श्रीमती र छोरी संलग्न रहेको ठहर भएको छ । सप्तरीको कल्याणपुर २ निवासी हकको हत्यामा संलग्न रहेको आरोपमा अदालतले सोमबार कारागारमा थुनामा रहेकी उनकी श्रीमती र छोरीलाई जन्मकैदको फैसला गरेको छ ।

जिल्ला न्यायाधीश महेन्द्रप्रसाद पोखरेलको इजलाशले हककी श्रीमती ५२ वर्षीया नुरजहाँ खातुन र छोरी २१ वर्षीया रुबेदा खातुनलाई जन्मकैदको फैसला गरेको छ । मुख्य आरोपित सिरहा जिल्ला चतरी गाविस ६ घर भई लहान नपा ५ पानीट्यांकी बस्ने ४० वर्षीय अब्दुल रउफलाई सर्वस्वसहित जन्मकैदको फैसला भएको स्रेस्तेदार नरेन्द्रकुमार श्रेष्ठले जानकारी दिए ।

नेपाल प्रहरीको केन्द्रीय अनुसन्धान ब्युरोको विशेष टोलीले हत्याका योजनाकारहरू छोरी रुबेदा र रउफलाई ०७० जेठ २३ गते तथा नुरजहाँलाई ०७० जेठ २४ गते पक्राउ गरेको थियो । नुरजहाँ रुबेदा कल्याणपुर २ स्थित घरबाट र हत्यामा प्रत्यक्ष संलग्न रउफ लहान ५ बाट पक्राउ परेका थिए । हत्याका मुख्य योजनाकार र संलग्न रुवेदाका प्रेमी भारतीय नागरिक लहान ५ मा झारफुकको काम गर्ने मौलवी ३९ वर्षीय जमिरुल शेख र सिरहा चतरी २ का ३४ वर्षीय एनुल शेख भने फरार रहेकोले मुद्दा मुल्तबी राखिएको छ ।

रुवेदा र जमिरको प्रेमसम्बन्धमा आमा नुरजहाँको सहमति रहे पनि बुबा हकको सहमति नभएपछि उनीहरूले ०६९ फागुनमा रौतहटमा गई विवाह (निकाह) गरेका थिए । सो विवाहलाई हकले अस्वीकार गर्दै आएकाले प्रेममा बाधक बनेको ठानेर योजना बनाई हत्या गरिएको अनुसन्धानमा संलग्न केन्द्रीय अनुसन्धान ब्युरोका तत्कालीन प्रहरी नायव उपरीक्षक दिनेश आचार्यले बताएका थिए ।

आचार्यका अनुसार केही पाउन केही गुमाउनु पर्छ भन्दै हककी श्रीमती नुरजहाँ, छोरी रुवेदा र छोरीका प्रेमी जमिरुलकै योजनामा हकको हत्या गरिएको थियो । अभियुक्तहरूले पाँच महिनाअघि बनाएको हत्याको योजनाअनुरूप छोरी रुवेदाले बुबाका हरेक गतिविधिबारे प्रेमी जमिरुललाई खबर गर्ने गरेको अनुसन्धानले देखाएको पूर्व क्षेत्रीय प्रहरी कार्यालयका तत्कालीन डीआइजी परशुराम खत्रीले जानकारी दिएका थिए ।

०७० जेठ ६ गते राति पूर्वसभासद् हक पेट्रोलपम्पमा एक्लै सुतेको खबर छोरी रुवेदाबाट पाएपछि जमिरुल, एनुल र रउफ सोही राति ९:३० बजे लहानबाट मोटरसाइकलमा आई पेट्रोल पम्पमा हत्या गरेको अनुसन्धानबाट खुलेको थियो ।