युरोकप फाइनलमा प्रभाव पार्नसक्ने खेलाडी
क्रिस्टियानो रोनाल्डो (पोर्चुगल)
पोर्चुगलको फाइनल यात्रामा स्ट्राइकर क्रिस्टियानो रोनाल्डोको भूमिका विशेष रह्यो । उनले आवश्यक समयमा टोलीका लागि गोल गरे, त्यसैले पोर्चुगल अगाडि बढ्यो । जारी संस्करणमा रोनाल्डोले तीन गोल गरेका छन्, केही गोलमा एसिस्ट पनि गरे ।
यी ३१ वर्षीय फुटबलरले व्यावसायिक खेल जीवनमा सम्पूर्ण सफलता हात पारे पनि सिनियर राष्ट्रिय टोलीका लागि १३ वर्षयता खेले पनि उपाधि जित्न सकेका छैनन् ।
सिनियर अन्तर्राष्ट्रिय फुटबलमा उपाधि जित्न नसके पनि क्लब फुटबलकै प्रदर्शनले उनी तीनपटक फिफा वर्ष खेलाडी बनिसकेका छन् । रोनाल्डोले पोर्चुगलका लागि उपाधि जित्ने सपना बारम्बार सुनाउँदै आएका छन् । यसै वर्ष आफ्नो क्लब रियल म्याड्रिडलाई युरोपियन च्याम्पियन बनाएका रोनाल्डो फाइनलमा सबैभन्दा आकर्षणको केन्द्रमा रहनेछन् ।
उनी राष्ट्रिय टोलीका कप्तान र सर्वाधिक गोलकर्तासमेत हुन् । युरोकपका चार संस्करणमा गोल गर्ने एक्लो खेलाडी हुन् भने युरोकपमा सर्वाधिक गोल गर्ने खेलाडीका रूपमा मिचेल प्लाटिनीको कीर्तिमान बराबरी पनि गरेका छन् ।
एन्टोइन ग्रिजम्यान (फ्रान्स)
जारी युरोकपमा अनुमान गरिएभन्दा बढी चर्चामा आएका स्ट्राइकर हुन्, एन्टोइन ग्रिजम्यान । उनले जारी प्रतियोगितामा सर्वाधिक ६ गोल गरेका छन् । प्रिक्वार्टरफाइनलमा आयरल्यान्ड र सेमिफाइनलमा जर्मनीविरुद्ध उनले दुईदुई गोल गरेका थिए ।
यी २६ वर्षीय खेलाडी पछिल्ला केही वर्षयता उत्कृष्ट लयमा छन् । लगातारको उत्कृष्ट लयकै कारण फाइनलमा उनी महत्वपुर्ण बन्न सक्नेछन् र पोर्चुगललाई टाउको दुखाइ पनि ।
दुई वर्षअघिमात्र सिनियर राष्ट्रिय टोलीमा डेब्यु गरेका ग्रिजम्यानले त्यसयता राष्ट्रिय टोलीको जर्सीमा ३३ खेल खेल्दै १३ गोल गरेका छन् । सन् २०१४ मा एट्लेटिको म्याड्रिडका लागि खेलेयता उनले यो क्लबका लागि एक सय सात खेलमा ५७ गोल गरेका छन् ।