ग्रिजम्यानलाई गोल्डेन बुट

पेरिस: युरोकप फुटबलको गोल्डेन बुट उपाधि फ्रान्सका एन्टोइन ग्रिजम्यानले जितेका छन् । युरोकपमा सर्वाधिक गोल गर्ने खेलाडीलाई गोल्डेन बुट प्रदान गरिन्छ । ग्रिजम्यानले युरोकपमा सर्वाधिक ६ गोल गरेका थिए । फाइनलसम्म कुल पाँच सय ५५ मिनेट मैदानमा बिताएका ग्रिजम्यानले दुईवटा गोलका लागि आफ्ना साथीलाई सहयोग पनि गरेका थिए ।

उनले युरोकपमा पोर्चुगलका कप्तान क्रिस्टियानो रोनाल्डो र फ्रान्सकै ओलिभर गिरोडलाई पछि पार्दै गोल्डेन बुट जितेका हुन् । सोमबार सम्पन्न युरोकपमा रोनाल्डो र गिरोडले तीनतीन गोल गरेका थिए । युरोकपमा फ्रान्सलाई फाइनलसम्म पुर्‌याउन २५ वर्षीय ग्रिजम्यानले महत्त्वपूर्ण भूमिका निर्वाह गरेका थिए । समूह चरणमा अल्बानियाविरुद्ध एक गोल गरेका उनले प्रिक्वार्टरफाइनलमा आयरल्यान्डविरुद्ध पनि दुई गोल गरेका थिए ।

यसैगरी क्वार्टरफाइनलमा आइसल्यान्डविरुद्ध एक गोल गरेका ग्रिजम्यानले सेमिफाइनलमा जर्मनीविरुद्ध पनि दुई गोल गरेका थिए । युरोकपको एडिडास सिल्भर बुट पोर्चुगलका रोनाल्डो र ब्रोन्ज बुट फ्रान्सका गिरोडले पाए । यसअघि युरोकपको अघिल्ला तीन संस्करणअन्तर्गत सन् २०१२ मा स्पेनका फर्नान्डो टोरेस, सन् २००८ मा स्पेनकै डेभिड भिल्ला र सन् २००४ मा चेक चणतन्त्रका मिलान बारोसले गोल्डेन बुट जितेका थिए ।

फ्रान्सलाई फाइनलसम्म पुर्‌याउन ग्रिजम्यानको महत्त्वपूर्ण भूमिका रह्यो । स्पेनिस क्लब एट्लेटिको म्याड्रिडबाट व्यावसायिक फुटबल खेल्ने ग्रिजम्यान युरोकपको इतिहासमै सर्वाधिक गोल गर्ने खेलाडीको सूचीमा पनि तेस्रो स्थानमा उक्लिएका छन् । उक्त सूचीमा मिचेल प्लाटिनी र क्रिस्टियानो रोनाल्डो नौ गोलसहित संयुक्त रूपमा पहिलो स्थानमा छन् । दोस्रो स्थानमा रहेका एलन सियररले सात र तेस्रो स्थानमा रहेका ग्रिजम्यानले ६ गोल गरेका छन् ।