विषाक्त रक्सीले २१ को ज्यान लियो
नयाँ दिल्ली : उत्तरी भारतमा विषाक्त मदिरा सेवनबाट ज्यान जानेको सङ्ख्या २१ पुगेको छ । भारतको उत्तर प्रदेशमा घरैमा निर्माण गरेको मदिरा पिउँदा २१ जनाको मृत्यु भएको छ ।
यसका कारण अझै केही व्यक्ति अस्पतालमा उपचार गराइरहेका छन् । तीमध्ये पाँच जनाको अवस्था गम्भीर रहेको बताइएको छ ।
भारतीय प्रहरीले जनाएअनुसार उत्तर प्रदेशको इताह जिल्लामा शुक्रबार राति मदिरा सेवन गरेका उनीहरूमा बान्ता हुने र पेट दुख्ने समस्या देखिएपछि अस्पताल भर्ना गरिएको थियो ।
उपचारकै क्रममा आइतबार अपराह्नसम्म १७ जनाको ज्यान गएको बताइएको थियो । तर साँझ यो सङ्ख्या बढेर २१ पुगेको बताइएको छ ।
इताह जिल्लाका एक जना प्रहरी अधिकारी विसर्जन सिंह यादवले भने– यसअघि शुक्रबारको विषाक्त रक्सी सेवनबाट गम्भीर रुपमा बिरामी परेका व्यक्तिमध्ये १७ जनाको ज्यान गएको थियो र आइतबार साँझ यो सङ्ख्या बढेर २१ पुगेको छ ।
यस्तो रक्सी उत्पादन गर्ने र स्थानीय मदिरा बिक्रेतालाई प्रहरीले शनिबारै केहीलाई पक्राउ गरी मुद्दा दायर गरेको छ ।
भारतमा हरेक बर्ष घरेलु रक्सी सेवनबाट सयौँ मानिसको अकालमा मृत्यु हुनेगर्छ । बर्सेनि यसरी घरेलु तर विषाक्त हुने गरेको रक्सीको सेवनबाट कैयौँको ज्यान जाने गरेको र यसमा संलग्नलाई कारबाही पनि गर्ने गरिएको छ । रासस/ एएफपी
प्रतिक्रिया दिनुहोस !
