क्रिकेटका नयाँ स्टार सन्दीप
काठमाडौँ: नेपाली राष्ट्रिय क्रिकेट टोलीका पूर्वप्रशिक्षक पुबुदु दसानायके मोफसल भ्रमणबाट राजधानी फर्कने क्रममा चितवनमा निस्किएका थिए ।
उनले त्यहाँ एक किशोरलाई बलिङ गरिरहेको देखे । ती किशोरको बलिङबाट लोभिएका पुबुदुले उनलाई कीर्तिपुर बोलाएर राष्ट्रिय टोलीसँगै प्रशिक्षण गर्न लगाए ।
तिनै किशोर सन्दीप लामिछाने नेपाली क्रिकेटमा नयाँ स्टारका रूपमा अगाडि आएका छन् ।
सन्दीपले पहिलो प्रयासमै यू—१९ राष्ट्रिय टोलीमा स्थान पाएका थिए । उनको प्रदर्शन पनि सशक्त रह्यो । चितवनका १६ वर्षीय यी लेग स्पिनरले बंगलादेशमा गत वर्ष भएको आईसीसी यू१९ विश्वकपको समूहगत चरणमा आयरल्यान्डविरुद्ध ह्याट्रिकसहित पाँच विकेट लिएका थिए ।
उनी उक्त विश्वकपमा एकमात्र ह्याट्रिककर्ता बनेका थिए । यू—१९ विश्वकपकै इतिहासमा यो केवल पाँचौं ह्याट्रिक थियो ।
उक्त विश्वकपमा नेपाली टोली उत्कृष्ट प्रदर्शन गर्दै क्वार्टरफाइनलसम्म पुगेको थियो । त्यस क्रममा सन्दीपले ६ खेलमा कुल १४ विकेट लिएका थिए र उनी विश्वकपमा सर्वाधिक विकेट लिने बलरको सूचीमा दोस्रो स्थानमा रहेका थिए ।
विशेषगरी उनले न्युजिल्यान्ड, भारत, बंगलादेश र पाकिस्तानविरुद्घ उत्कृष्ट बलिङ गरे । त्यसैले अन्तर्राष्ट्रिय सञ्चारमाध्यमले उनलको तुलना अस्ट्रेलियन लिजेन्ड सेन वार्नसँग गरेका थिए ।
यसअघि राजकुमार प्रधानलाई पनि सेन वार्नसँग तुलना गरिएको थियो । तर, १६ वर्षीय सन्दीपले सानो उमेर र छोटो समयमै थुप्रै अवसर पाएका छन् ।
भेरिएसनसाथ बलिङ गर्ने उनले अस्ट्रेलियाका पूर्वकप्तान माइकल क्लार्कसँग हङकङमा एकै टिमबाट पनि खेलिसकेका छन् । उनले राष्ट्रिय टिमबाट मेरिलिबोन क्रिकेट क्लबविरुद्ध लर्डसमा पनि मंगलबार खेले ।
राम्रै एक्सपोजर पाए पनि माथिल्लो तहमा भने उनको वास्तविक परीक्षण हुन बाँकी छ । स्पिनमा एकरूरुपता देखिए पनि उनी परिपक्व हुन अझै बाँकी छ ।
उनी २०७२ सालमा गरेको उत्कृष्ट प्रदर्शनका आधारमा पल्सर स्पोर्टस् अवार्ड २०७२ को पिपुल्स च्वाइस विधाको मनोनयनमा परेका छन् ।
सर्वाधिक एसएमएस भोट र फेसबुक लाइकका आधारमा विजेता चयन हुने पिपुल्स च्वाइसमा उनीसहित टेबुलटेनिसकी नविता श्रेष्ठ, भारोत्तोलनकी तारादेवी पुन, भलिबलकी प्रतिभा माली र फुटबलका नवयुग श्रेष्ठ मनोनयनमा छन् ।
पल्सर स्पोर्टस् अवार्डमा पिपुल्स च्वाइस, वर्षका उत्कृष्ट पुरुष र महिला खेलाडीको विजेताले पल्सर मोटरसाइकल पाउनेछन् । पल्सर स्पोर्टस् अवार्डको मुख्य प्रायोजक हंशराज हुलासचन्द एन्ड कम्पनी प्रालि रहेको छ।