पहिलो दिन कोहलीको शतक

एजेन्सीः कप्तान विराट कोहलीले शतक बनाएपछि भारतले वेस्ट इन्डिजविरुद्धको चार टेस्टको शृंखलाअन्तर्गत पहिलो खेलमा उत्कृष्ट सुरुवात गरेको छ ।
भारतले पहिलो दिनको खेल समाप्ति हुँदासम्म चार विकेट गुमाएर तीन सय दुई रन जोडेको छ । कोहली एक सय ४३ रनमा अविजित छन् । प्रारम्भिक ब्याट्सम्यान शिखर धवनले ८४ रन बनाए ।

यसैगरी अजिन्क्या राहानेले २२, चेतेश्वर पुजाराले १६ र मुरली विजयले सात रन जोडे । धवन र कोहलीबीच तेस्रो विकेटका लागि एक सय पाँच रनको साझेदारी भयो । कोहलीले चौथो विकेटका लागि रहानेसँग ५७ रनको साझेदारी गरे । पहिलो दिनको समाप्तिमा रविचन्द्रन आश्विन पनि २२ रनमा अविजित छन् । कोहलीले एक सय ९७ बलको सामना गरी १६ चौका प्रहार गरेका छन् ।

कोहलीले १२ औं टेस्ट शतक बनाएका हुन् । ४२ औं टेस्ट खेलिरहेका २८ वर्षीय कोहलीले १२ टेस्ट अर्धशतक पनि बनाएका छन् । कोहलीको टेस्ट क्रिकेटमा सर्वाधिक पाली एक सय ६९ रनको छ । उनले एकदिवसीय अन्तर्राष्ट्रिय क्रिकेटमा २५ शतक र ३६ अर्धशतक बनाएका छन् ।
कोहलीले धवनसँग मिलेर टोलीलाई सहज स्थितिमा पु¥याएका थिए । स्पिनर देवेन्द्र बिसोले उक्त साझेदारी तोडे । बिसोले बोल्ड गरेपछि धवन शतकको नजिकै पुगेर चुकेका हुन् ।

वेस्ट इन्डिजमा भएको टेस्टमा शतक बनाउने कोहली तेस्रो भारतीय कप्तान हुन् । यसअघि कपिल देव र राहुल द्रविडले मात्र यो सफलता हात पारेका थिए । कोहलीले टेस्ट कप्तानका रूपमा पाँच शतक बनाइसकेका छन्, ती सबै भारतबाहिर खेलिएका टेस्टमा बनेका हुन् ।
भारतबाहिर खेलिएका टेस्टमा सर्वाधिक शतक बनाउने भारतीय कप्तानका रूपमा कोहलीले मोहम्मद अजहरउद्दिनको कीर्तिमानको बराबरी गरेका छन् । बलिङतर्फ वेस्ट इन्डिजका बिसोले तीन र स्यानन गाब्रियलले एक विकेट हात पारे ।